काठमाडौं । हिमालयन हण्डसले क्विक्स बास्केटबल लिगमा जित हासिल गरेको छ । आइतबार भएको खेलमा हिमालयनले टिम बुढानिलकण्ठलाई पराजित गरेको हो ।
टिम बुढानिलकण्ठको घरेलु कोर्टमा भएको खेलमा हिमालयनले घरेलु टोलीलाई ७९ – ७५ अंकले पराजित गरेको हो । हिमालयनको जितमा सौरभ श्रेष्ठले ३० अंक जोडे । यो जितसँगै हिमालयन लिगको चौथो स्थानमा उक्लिएको छ ।
हिमालयनले १२ खेलबाट ७ खेलमा जित निकाल्दै २१ अंक जोडेको छ । लिगको प्ले अफ होडबाट बाहिरिसकेको टिम बुढानिलकण्ठको यो १० औं हार हो । लिगको शीर्ष स्थानमा आर्मी रहेको छ । आर्मीले लिगमा १० खेलमा १० जितसहित ३० अंक जोडेको छ । यस्तै समान २४ – २४ अंक जोडेपनि विशाल मिलन केन्द्र दोस्रो र गोल्डेनगेट इन्टरनेसनल कलेज तेस्रो स्थानमा रहेको छ ।
प्ले फर डीप्राइभ्ड चिल्ड्रेन नेपाल (पिडिसिएन) को आयोजनामा होम एण्ड अवे लिगको आधारमा जारी प्रतियोगिताको बिजेताले २ लाख प्राप्त गर्ने छन् । त्यस्तै उपविजेताले १ लाख र तेस्रोले ५० हजार पाउने छन् ।
यस्तै प्रतियोगिताको उत्कृष्ट खेलाडी, सर्वाधिक स्कोरकर्ता, डिफेन्स, इमर्जीङ प्लेयर र प्रशिक्षकले स्पोर्ट्स क्लोथिङ कम्पनीबाट १० हजार बराबरको गिफ्ट प्राप्त गर्ने छन् ।
