बीबीसी । सर्वोच्च शिखर सगरमाथामा फोहोर व्यवस्थापनको कार्य सुरु गरिएको छ । यस अन्तर्गत पर्यटकहरुले आरोहणका क्रममा छाडेका सय टन फोहोर व्यवस्थापनका लागि हवाइजहाजमार्फत काठमाडौँ पु¥याइने बताइएको छ ।

यो अभियानको पहिलो दिन नै लुक्लाबाट १२०० किलो फोहोर पुनःप्रयोग गर्न काठमाडौँसम्म ल्याइएको हो । आरोहणकर्ताहरुलाई आफ्ना साथमा लगेका सम्पूर्ण वस्तुहरु जस्ताको त्यस्तै फिर्ता ल्याउन भनिएपनि हरेक वर्ष स्थानीयवासीहरुले सयौँ किलो फोहोर संकलन गर्ने गरेका छन् । 

तरपनि पर्यटकहरुले छाड्ने फोहोरमा बियरका बोटल, फुड क्यान, अक्सिजनका बोटल लगायत ट्रेकिङका उपकरणहरु हुने गरकाले ती सबैलाई पुनःप्रयोग गर्न मिल्ने हुँदा व्यवस्थापनका लागि राजधानी ल्याइने भएको हो । यस कार्यक्रमका लागि यति एयरलाइन्सले सहकार्य गरिरहेको बताइएको छ ।

यसअघि भने सबै किसिमका सरसफाइ अभियान स्थानीयवासीहरुले सञ्चालन गर्दै आएका थिए । तर पछिल्लो समयमा भने सगरमाथा प्रदुषण नियन्त्रण समितिले यस कार्यको जिम्मा लिएको छ । 

तर अझैपनि स्थानीय शेर्पा वासिन्दाहरुले नै उचाइका फोहोर संकलन गर्दै आएको बताइएको छ । समितिका अनुसार गत वर्ष १ लाख भन्दा बढीले सो क्षेत्रको भ्रमण गरेका थिए । ती मध्ये ४० हजार आरोहणकर्ता रहेको बताइएको छ । त्यसैले स्थानीय र समितिले ती सम्पूर्ण मानिसहरुले छोडेका वस्तुगत लगायत जैविक फोहोरलाई समेत आफैँले व्यवस्थापन गर्नुपर्ने हुँदा यसअघि धेरै कठिनाइ भइरहेको उनीहरुले बताएका थिए । सन् २०१५ मा नै राष्ट्रिय पर्वतारोहण संघले अव्यवस्थित दिशापिशाबका कारण सगरमाथा क्षेत्रमा गम्भीर स्वास्थ्य समस्या देखा पर्ने चेतावनी दिएको थियो । अहिले भने समितिले क्याम्पका वरिपरि पोर्टेबल शौचालय स्थापित गराएको छ । 
http://www.bbc.com/news/world-asia-43443196