काठमाडौं । मागेको रकम नदिए ज्यान लिने धम्की दिँदै आएका छुट्टाछुट्टै समुहका तीन जनालाई काठमाडौं प्रहरीले पक्राउ गरेको छ । प्रहरीले वानेश्वर, कोटेश्वर, काँडाघारी क्षेत्रमा फिरौती माग्दै आएका सिनामंगलका ३० वर्षीय निमा लामा भनिने राजेन्द्र लामालाई पक्राउ गरेको छ । लामालाई दरबारमार्गबाट पक्राउ गरिएको हो ।
यस्तै १५ लाख नदिए छोरीलाई अपरहण गर्ने भन्दै धम्क्याउने ललितपुर महालक्ष्मी नगरपालिकाका २८ वर्षीय मनोज शाह र पेप्सीकोलाका मनोज श्रेष्ठ पनि पक्राउ परेका छन् । यो समुहलाई महानगरीय प्रहरी वृत्त वानेश्वरले पक्राउ गरेको काठमाडौं परिसरका एसएसपी विश्वराज पोखरेलले जानकारी दिए ।
पक्राउ परेका तीनै जनालाई महानगरीय प्रहरी परिसर टेकुमा राखिएको छ । उनीहरुले टेलिफोनबाट धम्क्याउँदै पैसा असुल गर्दै आएको प्रहरीले जनाएको छ ।