बीबीसी । ट्रम्प प्रशासनबाट निकालिने अधिकारीको सूचीमा अर्को नाम पनि थपिएको छ । यसपटक भने एफबीआई अनुसन्धान विभागका उपनिर्देशक एन्ड्रयु मकेबलाई बर्खास्त गरिएको छ । अवकास ग्रहण गर्न दुई दिन मात्र बाँकी हुँदा पनि उनलाई विभिन्न आरोपमा तत्कालै निकालिने निर्णय भएको बताइएको छ । एफबिआइकै अधिकारीले गरेको आन्तरिक जाँचमा मकेबले सूचना चुवाहट गरेको र जाँचकर्तालाई अज्ञात राखेको पाइएपछि महान्यायधिवक्ता जेफ सेसनले उनलाई बर्खास्त गर्ने निर्णय सुनाएका हुन् । 

मकेबले भने सबै आरोपलाई गलत ठहर गर्दै २०१६ को राष्ट्रपति चुनावमा रुसी हस्तक्षेप सम्बन्धि अनुसन्धानमा आफू संलग्न भएकाले एक्लो पारि निशाना बनाइएको बताएका छन् । अर्कोतर्फ राष्ट्रपति ट्रम्पले यस खबरप्रति खुसी व्यक्त गर्दै शनिबार ट्वीट गरेका हुन् ।  यसअघि पनि ट्वीटरमार्फत ट्रम्पले पटकपटक मकेबको आलोचना गर्दै आएका छन् । ट्वीटमा ट्रम्पले मकेबमाथि एफबिआइमा भइरहेको उच्च स्तरको भ्रष्टाचार र झुटा जानकारीबारे सबै थाहा भएर पनि चुप लागेर बसेको आरोप लगाएका हुन् । यो भन्दा अगाडि ट्रम्पले ‘एफबिआइका उपनिर्देशक मकेब पूरा लाभका साथ अवकाश ग्रहण तर्फ अघि बढिरहेका छन्, केबल ९० दिन बाँकी’ भन्दै ट्वीट गरेका थिए ।

मकेबले भने कानूनी संस्थाभित्र राजनीति बढेपछि यस्तो हुन्छ भन्ने बल्ल थाहा पाइरहेको भन्ने प्रतिक्रिया दिएका छन् । यसअघि ट्रम्पले विदेश मन्त्री रेक्स टिलरसनलाई पनि बर्खास्त गरेका थिए । यसबाहेक ट्रम्प प्रशासनबाट बाहिरिनेमा ह्वाइट हाउसका आर्थिक सल्लाहकार ग्यारी कन र स्वास्थ्य सचिव प्राइस जस्ता व्यक्तिहरु पनि रहेका छन् । उता ट्रम्पका वकिल, जोन डोडले मकेब बर्खास्त भएसँगै रुसी अनुसन्धान पनि अन्त्य गर्न अपील गरेका छन् । 

मकेबले ट्रम्प र एफबिआइ निर्देशकबीचको संवादको रेकर्ड राखेको खबर शनिबार बाहिर आएको थियो । उक्त रेकर्डिङले गत वर्ष बर्खास्त भएका एफबिआइका निर्देशक जेम्स कमेको पक्ष लिन सक्ने खुलासा गरिएको थियो । यसअघि कमेले राष्ट्रपति ट्रम्पले आफ्नो वफादारीता माग्दै रुसबारे अनुसन्धान अन्त्य गराउन आग्रह गरेको बयान दिएका थिए । त्यसैले आफूलाई कमे निकालिए पछिको अवस्थाबारे सम्पूर्ण कुरा थाहा भएको र रुसमाथि अनुसन्धानको प्रक्रियामा पनि धेरै अघि बढिसकेकाले आफूमाथि यस्तो प्रहार भएको मकेबको भनाइ छ ।