काठमाडौं । प्रतिपक्षी नेपाली कांग्रेसको भ्रातृ संगठन नेपाल तरुण दलले “कांग्रेस सुदृढीकरण र शुद्धिकरणमा युवाहरुको भुमिका“ विषयक अन्तरक्रिया कार्यक्रम सम्पन्न गरेको छ ।
तरुण दलले पार्टीकै भ्रातृ संगठन नेपाल विद्यार्थी संघका केन्द्रीय सदस्यहरुलाई आमन्त्रण गरेर अन्तरक्रिया कार्यक्रम सम्पन्न गरेको हो । कार्यक्रममा सहभागि नेविसंघका केन्द्रीय सदस्यहरुले आगामी ५ वर्षभित्रमा पार्टीलाई मजबुद बनाउन युवा लक्षित कार्यक्रम ल्याएर जनता सामु जानुपर्नेमा जोड दिएका छन् ।
उनीहरुले प्रतिनिधिसभा र प्रदेशसभा निर्वाचनमा पराजित हुँदैमा सर्वश्व नै समाप्त नभएको दावी गर्दै पार्टीलाई एक ढिक्का बनाएर अघि बढ्नु पर्नेमा जोड दिएका छन् । अन्तरक्रिया कार्यक्रमका सहभागिहरुले माउ पार्टी र भ्रातृ संगठनहरुमा एक व्यक्ति, एक पदको अवधारणा पनि ल्याउनु पर्ने सुझावसमेत दिएका छन् ।
नेविसंघ केन्द्रीय सदस्य पुनम भट्ट भट्टराईले पार्टी मजबुद बनाउन युवाहरुको भूमिका महत्वपूर्ण हुनेमा जोड दिँदै गुटगत विभेदको अन्त्य हुनुपर्नेमा जोड दिइन् । उनले पार्टीभित्रका असन्तुष्टिहरु सामाजिक सञ्जाल र सार्वजनिक स्थलमा छताछुल्ल पार्नुभन्दा पनि पार्टीको अन्तरिक कार्यक्रमहरुमा पोख्न पनि सुझाव दिइन् ।
त्यस्तै सिन्धुपाल्चोकका प्रविणजंग कार्कीले पार्टीलाई सुदृढिकरणका लागि प्रत्येक कांग्रेस नेता–कार्यकर्तामा सुदृढिकरणको इच्छाशक्ति आवश्यकता रहेको बताए ।
पार्टीलाई मजबुद बनाउन पार्टीमा देखिएको गुट–उपगुट भत्किन जरुरी रहेको उनको भनाई थियो ।
अर्का केन्द्रीय सदस्य सुनिता पोखरेलले पार्टीभित्र एकले अर्काेलाई गाली गर्नमा व्यस्त नरहेर समय समयमा पार्टीको हित अनुरुपका छलफल चलाउनु पर्ने बताइन् । उनले विरक्त भएर नभई आशावादी भएर अघि बढ्न युवापंक्तिलाई सुझाव दिइन् ।
अन्तरक्रियामा केन्द्रीय सदस्यहरु कल्पना खड्का, विमला भट्ट, प्रेमबहादुर शाही, शैलेन्द्र गौडेल, सुनिता पोखरेल, पम्फा कान्धारी, आरसी भट्टराई, पवन नेपाली नेपाल ल क्याम्पसकी सभापति रञ्जिता कार्की, तरुण दल काठमाडौंका सचिव दिनेशबिक्रम शाहअनुज चापागाँई, केशव खड्का, ईञ्जिनियर सुदर्शन शर्मा लगायतले पार्टीलाई मजबुद बनाउन एकढिक्का भएर अगाडि बढ्नुको विकल्प नरहेकामा जोड दिएका थिए ।
