एजेन्सी । फ्रेन्च लिग फुटबल लिग वनमा शीर्ष स्थानको पेरिस सेन्ट जर्मेन (पिएसजी) ले जित निकालेको छ । आइतबार राति भएको खेलमा पीएसजीले नाइसलाई २ – १ ले हराएको हो ।

पीएसजीले नाइसविरुद्ध सुरुवाती अग्रता उल्ट्याएर जित निकालेको हो । नाइसलाई उसैको मैदानमा हराउन पीएसजीका लागि एन्जल डी मारिया र ड्यानियल अल्भेसले समान एक एक गोल गरे । नाइसका एलेन सेन्ट म्याक्सिमिनले एक गोल फर्काए ।

एलिनाज रिभेराजमा भएको खेलमा सुरुवाती अग्रता भने घरेलु टोलीले लिएको थियो । खेलको १७ औं मिनेटमा एलेन म्याक्सिमिनले गोल गर्दै नाइसलाई सुरुवाती अग्रता दिलाए । तर, खेलको २१ औं मिनेटमा पिएसजीका डी मारियाले गोल गर्दै खेल १ – १ को बराबरीमा ल्याए । त्यसपछि खेलको ८२ औं मिनेटमा अल्भेले गोल गर्दै पिएसजीलाई २ – १ को महत्वपूर्ण जित दिलाए ।

यो जितसँगै पिएसजीले लिगमा १७ अंकको अग्रता बनाएको छ । पिएसजीले ३१ खेलबाट ८३ अंक जोडेको छ । लिगको दोस्रो स्थानको मोनाकोले ३० खेलबाट ६६ अंक जोडेको छ । पराजित नाइस ४२ अंक जोडेर लिगको आठौं स्थानमा छ ।