एजेन्सी । भारतले ट्राइ सिरिज टि – ट्वान्टी क्रिकेट अन्तर्गतको निदास ट्रफीको उपाधि जितेको छ । आइतबार राति भएको फाइनलमा बंगलादेशलाई ४ विकेट पराजित गर्दै भारतले उपाधि जितेको हो ।
कोलम्बोस्थित प्रेमादासा क्रिकेट मैदानमा बंगलादेशले दिएको १६७ रनको लक्ष्य भारतले अन्तिम बलमा ६ विकेट गुमाएर पुरा गर्यो । भारतको जितमा दिनेश कार्तिकले विजयी पारी खेले । जितका लागि १२ बलमा ३४ रन आवश्यक रहेको बेला कार्तिकले ८ बलमा अविजित २९ रन जोड्दै भारतलाई जित दिलाए । अन्तिम बलमा छक्का प्रहार गर्दै भारतलाई जित दिलाएका कार्तिकले ३ छक्का र २ चौका प्रहार गरे ।
यस्तै भारतको लागि कप्तान रोहित शर्माले ५६ रनको अर्धशतकीय पारी खेल्दा मनिस पाण्डेले २८ रन जोडे । त्यस्तै लोकेश राहुलले २४, विजय शंकरले १७ तथा शिखर धवनले १० रन जोडे । बंगलादेशका रुबेल हुसेनले दुई विकेट लिए ।
यसअघि टस हारेर पहिले ब्याटिङको निम्तो पाएको बंगलादेशले पुरै २० ओभरमा ८ विकेट गुमाएर १६६ रन बनाएको थियो । बंगलादेशको लागि सब्बीर रहमानले ७७ रनको योगदान दिए । त्यस्तै महमद उल्लाहले २१, हसन मिराजले अविजित १९ तथा तमिम इक्वालले १५ रन जोडे । भारतका लागि युजभेन्द्र चाहलले ३ तथा जयदेव उनाड्कटले २ विकेट लिए ।
आयोजक तथा घरेलु टोली श्रीलंकासम्मलित निदास ट्रफीमा भारतले समूह चरणको चार खेलमध्ये तीन खेल जित्दै शीर्ष स्थानमा रहदै फाइनलमा स्थान बनाएको थियो ।
यस्तै बंगलादेशले चार खेलमध्ये २ खेल जित्दै दोस्रो स्थानमा रहदै फाइनलमा भारतसँगको भेट पक्का गरेको थियो । चार खेलमा एक खेलमा जित निकालेको श्रीलंका भने समूह चरणबाट बाहिरिएको थियो ।
