काठमाडौं । एकदिवसीय मान्यता प्राप्त नेपाली क्रिकेट टोलीलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ । जिम्बावेमा भएको आईसीसी विश्वकप छनोट क्रिकेटमा सहभागिता जनाएर नेपाली राष्ट्रिय क्रिकेट टोली आज स्वदेश फर्किएको हो ।
कुल १० राष्ट्र सहभागी विश्वकप छनोटमा नेपाल आठौं स्थानमा रहन सफल भएको थियो । नेपालले आईसीसीबाट अस्थायी रुपमा एकदिवसीय राष्ट्रको मान्यता प्राप्त गर्दै ऐतिहासिक सफलता पाएको थियो । नेपालले आईसीसीबाट सन् २०२२ सम्मको लागि एकदिवसीय मान्यता पाएको हो । यो नेपाली क्रिकेटको २२ वर्षे क्रिकेट यात्रामा सबैभन्दा ठूलो सफलता हो । एसोसियट राष्ट्रको मान्यता पाएको २२ बर्षपछि नेपालले पहिलोपटक एकदिवसीय मान्यता पाएको हो ।
यस्तै नेपालले प्रतियोगितामा आईसीसीबाट सी ग्रेड प्राप्त गरेको थियो । छनोटको सुपर सिक्स पुग्न असफल नेपालले समूह चरणमा ३ खेलमा हार बेहोरेको थियो भने एक खेलमा जित हात पारेको थियो ।
पहिलो खेलमा आयोजक जिम्बावेसँग ११६ रनले पराजित भएको नेपाल दोस्रो खेलमा स्कटल्याण्डसँग ४ विकेटले पराजित भएको थियो । तेस्रो खेलमा अफगानिस्तानसँग ६ विकेटले पराजित भएको नेपाल समूह चरणको अन्तिम खेलमा हङकङमाथि ५ विकेटको जित दर्ता गराएको थियो ।
यस्तै नेपालले प्लेअफमा पपुवा न्युगिनीलाई ६ विकेटले पराजित गर्दै एक दिवसीय मान्यता पाएको थियो । तर, नेपाल सातौँ स्थानको लागि भएको खेलमा नेपाल नेदरल्याण्डसँग ४५ रनले पराजित भएको थियो ।
एकदिवसीय मान्यता पाएसँगै नेपालले थुप्रै अवसर पाएको छ । नेपालले आईसीसीबाट पाउदै गरेको आर्थिक तथा अन्य सुविधामा उच्च वृद्धि हुनेछ । त्यस्तै नेपालले आईसीसी विश्व क्रिकेट लिग च्याम्पियनसिप, इन्टर कन्टिनेन्टल कप जस्ता उच्च श्रेणीको क्रिकेट खेल्ने मौका पाउनेछ । खेलाडीको स्वागतका लागि नेपाल खेलकुद परिषदका सदस्यसचिव लगायतका पदाधिकारी विमानस्थल पुगेका थिए ।
