एजेन्सी । चारा घोटालाको चौथो मुद्दामा केन्द्रीय जाँच ब्यूरो (सीबीआई) को विशेष अदालतले बिहारका पूर्व मुख्यमन्त्री लालुप्रसाद यादवलाई दोषी ठहर गरेको छ । सोही मामिलामा बिहारकै अर्का पूर्व मुख्यमन्त्री जग्गनाथ मिश्रालाई भने निर्दोष ठहर गरेको छ ।
चारा घोटाला मुद्दामा ३१ जनाविरुद्ध आरोप तय गर्दै मुद्दा दायर भएको थियो । अदालतले जस मध्ये १९ जनालाई दोषी १२ जनालाई निर्दोष ठहर गरेको छ । दोषीलाई सजाय तोक्न मार्च २१, २२ र २३ मा अदालतमा बहस हुने भारतीय सञ्चार माध्यमहरुले जनाएका छन् ।
चारा घोटाला मुद्दामा दोषी ठहर गरिएका बिहारका मुख्यमन्त्री यादव झारखण्डको जेलमा सजाय काटीरहेका छन् । उनी विरुद्ध चारा घोटाला ६ मुद्दा दायर छन् । अहिलेसम्म चार मुद्दामा उनी दोषी ठहर भइसकेका छन् भने दुई मुद्दाहरु अझै पनि अदालतमा बिचाराधिन छन् ।
राजनीतिक प्रतिक्रिया ?
लालु यादवलाई दोषी ठहर गरेसँगै आरजेडीका वरिष्ठ नेता रघुवंश प्रसाद सिंहले अदालतको फैसलामाथि सवाल उठाएका छन् । जग्गनाथ मिश्रालाई निर्दोष र लालु यादवलाई मात्रै दोषी ठहर गरिएको भन्दै उनले आपत्ति जनाएका छन् ।
उता जेडीयू नेता नीरज कुमारले कटाक्ष गर्दै फैसलालाई सही रहेको बताएका छन् । लालुप्रसाद यादव यस अघि नै तीन मामिला दोषी ठहर भइसकेकाले अदालतले चौथो मामिलामा दोषी ठहर गर्दा कुनै फरक नपर्ने उनको भनाई छ ।