एजेन्सी । नासाले सौर्यमण्डलमा सूर्यबाट निस्कने प्रकाश (ऊर्जा) को मात्रा पत्ता लगाउने भएको छ । नासाले ऊर्जाको मात्रा पत्ता लगाउन अन्तरराष्ट्रिय अन्तरिक्ष स्टेशन (आईएसएस) मा नयाँ र आधुनिक उपकरणहरु जडान गरेको छ ।
आईएसएसमा लगाइएको टोटल एण्ड स्पेक्ट्रल सोलर इर्रेडिएन्स सेन्सर (टीएसआईएस–१ पूर्ण रुपमा काम गरिरहेको र आंकडा एकत्रित गरिरहेको नासाको भनाई छ ।
नासाको गोड्डार्ड स्पेस फ्लाइट सेन्टरमा टीएसअईएस–१ का परियोजना वैज्ञानिक डोंग वू ले टीएसआईएस–१ ले विस्तृत आंकडा संकलन गर्ने बताए । आंकडाबाट धर्तीको विकिरणमा सूर्यको प्रभाव, पर्यावरणीय चक्र, परिस्थिति र पृथ्वीको प्रणाली तथा जलवायु परिवर्तनमा पर्ने प्रभाव बारे बुझ्न सहयोग मिल्ने उनको भनाई छ ।
यो उपकरणलाई १५ डिसेम्बर २०१७ मा फ्लोरिडाको केप केनेवरल एयरफोर्स स्टेशनबाट स्पेस एक्स फाल्कन–९ रकेटबाट रवाना गरिएको वेब दुनियाँ डटकमले जनाएको छ ।