काठमाडौं । गृहमन्त्री रामबहादुर थापा ‘बादल’ आज (बुधबार) बिहान खाना खाने बेलामा महानगरीय प्रहरी वृत्त अनामनगर पुगे । उनी खाना खानका लागि प्रहरी वृत्त पुगेका होइनन् । तर, उनले प्रहरीको मेसमा बसेर जवानहरुसँगै खाना खाए । 

महानगरीय प्रहरी वृत्त अनामनगरको आकस्मिक निरीक्षण गर्न पुगेका गृहमन्त्री थापाले वृत्तको उजुरी शाखा, महिला शाखा, ब्यारेक, कैदी कक्ष, भण्डार कक्षलगायतको निरीक्षण गरे । 
सबै निरीक्षण सकेपछि उनी मेस पनि हेर्नुपर्यो भन्दै वृत्तको मेसतिर लागे । खाना खाइरहेका प्रहरीहरु गृहमन्त्री आएको देखेर जर्याकजुरुक उठ्न खोजे । तर, थापा उनीहरुलाई नउठ्न आग्रह गर्दै भान्सातिर लागे । 

भान्सामा पुगेर मन्त्रीले सोधे, “हामी पनि यही खाना खान्छौं, पुग्छ ?” उनको प्रश्नमा भान्सामा रहेका जवानहरु सुरुमा त अकमकिए । मन्त्रीले साँच्चिकै भनेको थाहा पाएपछि एक जवानले भने– पुग्छ हजुर ! ‘त्यसो भए हामीलाई पनि खाना ल्याउनुहोस् भन्दै मन्त्री खाना खाइरहेका प्रहरीहरुसँगै बसे । आज भान्सामा दाल, भात, आलु र गोभीको तरकारी, साग र आलुको अचार बनेको रहेछ । ‘गृहमन्त्री आउने जानकारी पाएको भए मासु पनि पकाउन हुन्थ्यो,’ एक जवानले टिप्पणी गरे । अचानक आइपुगेका गृहमन्त्रीलाई वृत्तका प्रहरीले सलामीसमेत अर्पण गर्न पाएनन् । 

खाना खाएपछि मन्त्री थापाले प्रहरीहरुलाई जनताको जिउधनको सुरक्षाका लागि दत्तचित्त भएर लाग्न  निर्देशन दिए । सुरक्षा निकायका अन्य अंगभन्दा नेपाल प्रहरीको रासनमा विभद रहेकोबारे आफू जानकार रहेको भन्दै गृहमन्त्रीले त्यो असमानता हटाउन पहल गर्ने प्रतिवद्धता व्यक्त गरे ।