site stats
बाह्रखरी :: Baahrakhari
सम्पादकीय
Nabil BankNabil Bank
Sarbottam CementSarbottam Cement
Ghorahi CementGhorahi Cement

नेपालको संविधान, २०७२ लाई संशोधन गर्न राखिएको दोस्रो प्रस्ताव त्यतिबेलाको प्रमुख विपक्षी नेकपा (एमाले)को चर्को विरोधका कारण विफल भएको थियो । गत भदौ ५ गते भएको मतदानमा संशोधन प्रस्तावका पक्षमा ३७४ र विपक्षमा २०६ मत परेकाले दुई तिहाइ बहुमत पुग्न नसकेर प्रस्ताव पारित हुन सकेको थिएन । त्यतिबेलाका सत्तारुढ दलहरू नेपाली कांग्रेस र नेकपा (माओवादी केन्द्र)का साथै तराई केन्द्रित दलहरूले संविधान संशोधनका पक्षमा मतदान गरेका थिए । एमाले र केही साना दलहरूले संशोधनको विपक्षमा मतदान गरेकाले दुई तिहाइ बहुमत नपुगेर संविधान संशोधन प्रस्ताव असफल भएको थियो । चुनावमा संविधान संशोधनको विपक्षमा उभिएको एमालेको नेतृत्वमा रहेको कम्युनिस्ट गठबन्धनले सुविधाजनक बहुमत पायो । तर, नजाने के कारणले हो कम्युनिस्ट गठबन्धनका नेताले पनि संविधान संशोधनको रट लगाउन थालेका छन् । चुनावपछि सेलाएजस्तो देखिएको संविधान संशोधनको विषयलाई अहिले फेरि सत्तारुढ गठबन्धनबाटै बढी चर्चामा ल्याउनुको कारण भने संविधान संशोधनलाई चुनावी मुद्दा बनाउँदै आएका तराई केन्द्रित दलहरूलाई सन्तुष्ट राख्नमात्र हो कि अरू केही छ भन्ने स्पष्ट हुनसकेको छैन ।

प्रधानमन्त्री केपी ओलीको ’आवश्यकता र औचित्यअनुसार’ संविधान संशोधन गर्न सकिने भन्ने कथनलले थप अन्योल उत्पन्न गरेको छ । मधेसी दललाई सरकारमा ल्याउनलाई मात्र संविधान संशोधनको चर्चा गरिएको भान पर्ने अभिव्यक्ति पनि सत्तारुढ दलका केही नेताबाट सुनिन थालेको छ । चुनावपूर्व नै गठबन्धन बनाएर पार्टी एकताको चरणमा रहेका एमाले र माओवादी केन्द्रसँग सुविधाजनक बहुमत छ । प्रधानमन्त्रीले संसद्को सकेसम्म धेरै संख्याको समर्थन खोज्नु पनि अस्वाभाविक होइन । तर, कुन बुँदामा किन गर्ने भन्ने विषयमा स्पष्ट नभई अहिले संविधान संशोधनको रट लगाउनु भने सहज देखिएको छैन । प्रधानमन्त्री ओलीले भनेजस्तै आवश्यकता र औचित्यअनुसार संविधान संशोधन गर्ने हो भने पनि सबैभन्दा पहिले संशोधनका विषयहरूमा व्यापक छलफल हुनु जरुरी देखिन्छ । अहिले त संविधान संशाेधनका पक्ष र विपक्षमा भएका दुवैथरीका अाँखामा छारो हाल्ने धूर्तताकाे नाटकमात्र मञ्चन हुने देखिएकाे छ ।

Agni Group

रुपान्तरित संसद्बाट अस्वीकृत दोस्रो संशोधन विधेयकमा नेपालीसँग विवाह गर्ने विदेशीको अंगीकृत नागरिकता, सरकारी कामकाजका भाषा, जनसंख्याको आधारमा प्रतिनिधित्व र राष्ट्रिय सभाको निर्वाचनसम्बन्धी बुँदा थिए । तिनैलाई एमालेले ’राष्ट्रघाती’ भन्दै चर्को विरोध गरेको थियो । तराई केन्द्रित दलहरू र केही हदसम्म नेपाली कांग्रेसले पनि चुनावमा संविधान संशोधनका पक्षमा रहेको भनेर मत मागेका थिए । तर, प्रदेश नम्बर २ संविधान संशोधनका पक्षमा रहेका दलहरूको बहुमत भए पनि अरू प्रदेशमा तिनको खासै प्रभाव देखिएन । कांग्रेस पनि निकै खुम्चियो । अर्थात्, जनमत संविधान संशोधनका पक्षमा देखिएन । तैपनि, तराईका जनता संविधान संशोधनको व्यग्र प्रतिक्षामा छन् भन्ने हौवा फैलाएर देशलाई सधैँ राजनीतिक अस्थिरतामा राख्ने चलखेल हुनु र त्यसलाई सत्तापक्षले समेत प्रकारान्तरले मलजल गर्नु दुर्भाग्यपूर्ण स्थिति हो ।  

एमालेले जनादेश माग्दा विरोध गरेको संशोधनका बुँदाहरूलाई नै अहिले स्वीकार गरेमा त्यो जनतालाई धोका दिएको ठहरिनेछ । यसैले संविधान संशोधनको प्रस्ताव गर्नेहरूले कुनकुन विषयमा कस्तो संशोधन चाहेको हो भन्ने स्पष्टरूपमा सार्वजनिक गर्नुपर्छ । प्रधानमन्त्री ओलीले पनि पहिले ‘राष्ट्रघाती’ ठानिएको प्रस्ताव अहिले कसरी स्वीकार्य हुने हो भन्ने नेपाली जनतालाई स्पष्ट जानकारी दिनुपर्छ । अहिले त, संविधान संशोधनको हौवा भारत रिझाउन तराई केन्द्रित दललाई सरकारमा सामेल गर्ने बहाना र संवैधानिक निकायका पदाधिकारीलाई तर्साउन पुग्ने शक्ति जुटाउने प्रयत्नमात्र देखिएको छ । तराई केन्द्रित दलले पनि संविधान स्वीकार गरेर चुनाव लड्ने, एउटा प्रदेशमा सरकार बनाउने गरिसकेपछि संघीय सरकारमा भाग लिन सर्त वा बहानावाजी गरिरहनु जरुरी छैन । सरकारमा सहभागी भएरै पनि उपयुक्त समयमा संशोधनका लागि प्रयास गर्न त मिल्थ्यो । संविधान संशोधनलाई दुई तिहाइ बहुमत जुटाइराख्ने कपटी चाल नबनाइयोस् । कपट र धुत्र्याइँबाट लोकतन्त्रको सही अभ्यास हुनसक्तैन । कम्युनिस्ट गठबन्धनलाई नेपाली जनताले दिएको बहुमत पौराणिक कथामा भष्मासुरलाई महादेवले दिएको बरदानजस्तो नहोस् !   

Global Ime bank

 

NIBLNIBL
प्रकाशित मिति: बुधबार, चैत ७, २०७४  १३:३८
Sipradi LandingSipradi Landing
worldlinkworldlink
प्रतिक्रिया दिनुहोस्
Ncell Side Bar LatestNcell Side Bar Latest
Bhatbhateni IslandBhatbhateni Island
Kumari BankKumari Bank
Shivam Cement DetailShivam Cement Detail
Maruti cementMaruti cement
सम्पादकीय
ICACICAC