काठमाडौं । मंसिर ३ गते चलचित्र ‘शत्रु गते’ वीरगञ्जको जितपुरमा छायांकन भैरहेको थियो । विवाहको दृश्यका लागि भब्य मन्डप तयार पारिएको थियो । चलचित्र छायांकन भैरहेको थियो । चलचित्रका अधिकांश कलाकार छायांकन स्थलमै थिए । नायिका प्रयंका कार्की पनि सेटमै थिइन् । सामाजिक सञ्जालमा राम्रो फ्यान फलोइङ भएकी प्रियंका जहाँ गयो त्यहीँ सेल्फी खिचेर पोष्ट गरिहालिछन् । विवाहको भब्य सेटले उनलाई लोभ्यायो । इन्टाग्राम अन गरिन् र सेल्फी खिचिन् । फोटोको बीचमा एमानको सेतो मान्छे जस्तो ब्यक्ति आयो । उनले दोहोर्याएर सेल्फी खिचिन् । उनको फोटोसँगै त्यही सेतो मान्छे आयो । सँगै रहेकी नायिका आँचल शर्मालजाई उनले आफ्नो सेल्फीमा आएको तस्बिर देखाइन् । आँचलले पनि इन्टाग्रामबाट सेल्फी लिइन् । उनको सेल्फीमा पनि त्यही सेतो ब्यक्ति आयो । 

“एक कान दुइकान मैदान भयो । केही स्थानीयले भगवान रिसाएर भूत प्रकट भयो भने, अब अनिष्ट हुन्छ भने । यस्तो कुरा सुनेर प्रियंका बेहोस भइन्,” ‘शत्रु गते’का निर्देशक प्रदीप भट्टराई उक्त घटना सम्झँदै भन्छन्, “केही भने ठिक उल्टो भगवान खुसी भएर प्रकट भए । चलचित्र राम्रो हुन्छ भन्न थाले । बेहोस भएकी प्रियंकाललाई होसमा आउन निकै समय लाग्यो । कसैले भूत कसैले भगवान भन्न थालेपछि सुटिङ रोकियो । वास्तविकता के हो अन्योल भयो ।”

न थियो भूत न थियो भगवान । रहस्य भोलीपल्ट विहान खुल्यो । नायक पल शाहले पत्ता लगाए त्यो दिन इन्टाग्रामले दिएको फिचर रहेछ मान्छे जस्तो देखिने सेतो आकृति । 

चलचित्र ‘शत्रु गते’ यही शुक्रबारबाट अल नेपाल प्रदर्शन हुँदैछ ।