एजेन्सी । अर्जेन्टिनाका प्रशिक्षक जोर्गे साम्पाओलीले रुस विश्वकपमा स्टार स्ट्राइकर लियोनल मेस्सीले अर्जेन्टिनाको टोलीलाई बोक्न सक्ने बताएका छन् । इटालीविरुद्धको मैत्रीपूर्ण खेलअघि प्रशिक्षक साम्पाओलीले मेस्सीसँग अर्जेन्टिनाको टोलीलाई अगाडी बढाउन सक्ने क्षमता रहेको बताएका हुन् ।
अर्जेन्टिनाले इटालीसँग शनिबार अन्तर्राष्ट्रिय मैत्रीपूर्ण खेल खेल्दैछ । रुस विश्वकपमा छनोट हुन असफल इटालीसँगको खेलअघि साम्पाओलीले भने, “मेस्सी सबैभन्दा राम्रा खेलाडी हुन् र मेस्सी परिपक्वताको चरणमा छन् । त्यसैले उसले आफ्नो काधमा टिम बोक्न सक्छ ।”
अर्जेन्टिनाका कप्तान मेस्सीले यो सिजन क्लब बार्सिलोनाबाट उत्कृष्ट खेल्दै आएका छन् । मेस्सी ला लिगामा सर्वाधिक गोलकर्ताको शीर्ष स्थानमा छन् । मेस्सीको उच्च प्रदर्शनले नै बार्सिलोना ला लिगाको उपाधि होडमा रहेको छ ।
विश्वकप छनोटको अन्तिम खेलमा इक्वेडरविरुद्ध मेस्सीले ह्याट्रिक गोल गर्दै अर्जेन्टिनालाई विश्वकपमा पुराएका थिए । मेस्सी चार बर्षअघि भएको ब्राजिल विश्वकपमा उत्कृष्ट खेलाडी घोषित भएका थिए । तर, फाइनलमा जर्मनीसँग १ – ० ले स्तब्ध हुँदै अर्जेन्टिना उपाधि जित्नबाट बन्चित भएको थियो ।