काठमाडौं । विश्वकप छनोट क्रिकेट प्रतियोगितामा आज अफगानिस्तान र आयरल्याण्डबीच प्रतिस्पर्धा हुँदैछ । सुपर सिक्सको अन्तिम खेलको रुपमा रहेको यी दुई टिमबीचको विजेता विश्वकपमा प्रवेश गर्नेछ ।
जिम्बावेको हरारे स्पोर्ट्स क्लबमा हुने खेलमा दुबै टिम जितको खोजिमा हुनेछन् । अफगानिस्तान र आयरल्याण्ड एकैस्तरका टिम हुन् । यी दुई टिमले आईसीसीबाट २०१७ मा सँगै टेष्ट मान्यता पाएका थिए ।
आयोजक जिम्बावे कमजोर मानिएको युएईसँग डिएल मेथोडमा ३ रनले पराजित भएसँगै आयरल्याण्ड र अफगानिस्तानको विश्वकपमा प्रवेश गर्ने भाग्य चम्किएको हो । अफगानिस्तान र आयरल्याण्डको समान ४ अंक रहेको छ । यता, युएईसँग पराजित भएको जिम्बावेको भने ५ अंक रहेको छ ।
विश्वकप छनोटअन्तर्गत सुपर सिक्सको आफ्नो अन्तिम खेलमा स्कटल्याण्डलाई डिएल मेथोडमा ५ रनले पराजित गर्दै वेष्ट इन्डिज यसअघि नै विश्वकपमा प्रवेश गरिसकेको छ ।