काठमाडौं । अघिल्लो सरकारले गरेको निर्णयलाई नयाँ सरकारले निरन्तरता नदिँदा विपन्न जीविकोपार्जन भत्ता अन्योलमा परेको छ । गत माघ ११ गते राष्ट्रिय ट्रमा सेन्टरमा उपचार गरिरहेका मिर्गौला, क्यान्सर र स्पाइनल इन्जुरीका करिब २ दर्जन बिरामीलाई अघिल्लो सरकारका प्रधानमन्त्री शेरबहादुर देउवाले मासिक ५ हजार रुपैयाँ जीविकोपार्जन भत्ता दिएर कार्यक्रमको शुरुवात गरेका थिए । तर, त्यसपछिका दुई महिनासम्म पनि भत्ता नपाएको बिरामीहरुको गुनासो छ ।
स्वास्थ्य सेवा व्यवस्थापन महाशाखाका अधिकृत प्रकाश घिमिरेले भने अहिले बिरामीको तथ्यांंक लिने काम भइरहेको बताएका छन् । उनले भने, “भत्ता वितरणका विषयमा नयाँ मन्त्रीबाट निर्देशन आएपछि मात्र अघि बढ्छ । अहिलेसम्म १२ वटा अस्पतालबाट मृगौलाको डाईलासिस गरिरहेका, क्यान्सरको किमो लिइरहेका र स्पाईनल इन्जुरी भई प्यारालाईसिस भएका २ हजार बिरामीको तथ्यांक आएको छ । कतिपय अस्पतालले बिरामीको तथ्यांक पठाउन पनि अटेरी गरेका छन् ।”
वीर अस्पतालमा मृगौलाको डाईलासिस गरिरहेका सामाखुसीका नेत्रप्रसाद पाण्डेले सरकारले दिएको विपन्न जीविकोपार्जन भत्ताको पहिलो किस्तामात्र पाएको बताए । उनले भने, “पहिलो ५ हजार भत्ता रकम पाइयो तर त्यसपछि २ महिना भयो, आएको छैन भनेर दिएनन् ।”
जीविकोपार्जन भत्ताको कार्यविधिअनुसार क्यान्सरको उपचाररत बिरामी, मिर्गौला फेल भई डायलासिस गराईरहेका तथा प्रत्यारोपण गरेका विरामी र स्पाइनल इन्जुरीका कारण प्यारालाइसिस भएका विरामीले मासिक ५ हजार रुपैयाँ पाउँछन् । तत्कालिन स्वास्थ्यमन्त्री दीपक बोहराको प्रस्तावमा गत १३ पुसमा बसेको मन्त्रिपरिषद् बैठकले जीविकोपार्जन भत्ता उपलव्ध गराउने निर्णय गरेको थियो ।
सरकारले छुट्याएको १२ करोड रुपैयाँले यस वर्षको अन्त्यसम्म पनि नपुग्ने भएपछि मन्त्रालयले भत्ता कार्यक्रम रोकेको मन्त्रालयका प्रवक्ता डा. श्रीराम गिरिले बताए । उनले भने, “यस वर्षको लागि थप ८० करोड रुपैयाँ आवश्यक पर्ने देखिएपछि भत्ता कार्यक्रम रोकिएको हो ।”