काठमाडौं । भूकम्पले क्षति पुर्याएको काठमाडौंको काष्ठमण्डप पुनपिर्नर्माणमा स्थानीयले चासो देखाउँदै आएका छन् । काष्ठमण्डपको पुनर्निर्माण चाँडो हुनुपर्ने भन्दै यहाँका स्थानीयबासीले बुधबार पुरातत्व विभागको ध्यानाकर्षण गराएको वसन्तपुरका स्थानीय तथा सम्पदाप्रेमी गणपतिलाल श्रेष्ठले बताए । 

काष्ठमण्डप पुनर्निर्माणमा स्थानीयबासीको प्रतिनिधित्व रहनुपर्ने आफूहरुको माग रहेको श्रेष्ठले बताए । “काष्ठमाण्डप पुनर्निर्माणमा स्थानीयको समेत प्रतिनिधित्व हुनुपर्छ,” श्रेष्ठले भने । यसअघि पुरातत्व विभाग र काठमाडौं महानगरपालिका बीचमा यसको पुनर्निर्माणका लागि हानाथाप चल्दै आएको थियो ।

हाल आएर काष्ठमण्डप पुनर्निर्माणका लागि महानगरले चासो देखाएको छ । तर महानगरपालिकाले आफूखुसी ढङ्गले विभिन्न निर्माण कम्पनीलाई पुनर्निर्माणको जिम्मा दिएकोमा स्थानीयको आपत्ति छ । 

विभिन्न विदेशी निर्माण कम्पनीहरुले काष्ठमण्डप पुनर्निर्माण गर्दा समयमै सम्पन्न नगर्ने, स्थानीयको मागलाई सम्बोधन नगर्ने सम्पदा बचाऔं अभियन्ताहरुको भनाइ छ ।
“स्थानीयबासीको समिति गठन गरी आएको निर्णयबाट काष्ठमण्डपको पुनर्निर्माण हुनुपर्छ,” सम्पदाप्रेमी श्रेष्ठले भने, “स्थानीयको प्रतिनिधित्व हुनुपर्छ भन्ने हाम्रो मुख्य माग हो, यसको पुनर्निर्माणमा अनावश्यक ढिलाइ भइरहेको छ अब चाँडै काम अगाडि बढाइनुपर्छ ।”