चितवन । चितवनमा कवि भीष्म उप्रेतीको कवितासङ्ग्रह ‘आधा उज्यालोे’माथि विमर्श गरिएको छ ।
चितवन साहित्य परिषद् र कविडाँडा साहित्य समाजको संयुक्त आयोजनामा कवि उप्रेतीको कवितासङ्ग्रहमाथि चर्चा गरिएको हो । कवितामाथि चर्चा गर्दै चितवन साहित्य परिद्का अध्यक्ष सुरेन्द्र अस्तफलले कवि उप्रेतीका कविता सरल भाषामा बिम्ब र प्रतीकको प्रयोग हुने हुँदा कवितामा आस्वाद रहेको बताए ।
कवि एवम् लेखक सरिता तिवारीले उप्रेतीको कवितामा सरल भाषा शैली र शालिन अभिव्यक्ति पाइने भए पनि कवितामा जोखिम उठाउन नखोजिएको टिप्पणी गरिन् । तर, कविहरु सधैँ प्रतिपक्षमा रहेर कविता कोर्नुपर्ने उनको विचार थियो ।
कवि एम् गजलकार द्वारिका नेपालले छोटा आयम भएका कविता लेख्न कवि सक्षम रहेको बताए । सुक्ष्मभन्दा सुक्ष्म अनुभूतिलाई कलात्मक तरिकाले प्रस्तुत गर्न कवि उप्रेती सफल भएको उनको भनाइ छ ।
कवि केदारनाथ खनालले पनि कवि उप्रेतीका कविता सहजै बुझिने र सबैको जीवन छुने खालको रहेको बताए ।
कार्यक्रममा सबैको टिप्पणी र चर्चापछि बोल्दै कवि उप्रेतीले आफ्ना अनुभव भने, “प्रायः यात्रा गर्ने क्रममा कविता लेख्न मन पराउँछु । त्यसैले कतिपय कवितामा यात्राका सन्दर्भ जोडिने गरेको छ ।”
“म कवितालाई प्रकृतिसँग जोडेर हेर्ने गर्छु । कोठामा बसेर मैले अहिलेसम्म कविता लेखेकै छैन”, उनले भने ।
उप्रेतीका कवितासङ्ग्रहमा ५४ वटा कविता सङ्ग्रहित छन् । पहिलो खण्डमा देश, दोस्रो खण्डमा प्रकृति र तेस्रो खण्डमा मान्छेलाई कवितामार्फत प्रस्तुत गरिएको छ ।
सोही अवसरमा वर्तमानमा नेपाली कविताको दिशा र प्रवृतिबारे पनि विमर्श गरिएको थियो ।
कार्यक्रम चितवन साहित्य परिषद्का अध्यक्ष सुरेन्द्र अस्तफल र कविडाँडा साहित्य समाजका अध्यक्ष एलबी क्षेत्रीको संयुक्त अध्यक्षतामा सम्पन्न भएको हो ।