एजेन्सी । चिनियाँ विदेश मन्त्रालयले खबर गरेअनुसार बेइजिङबाट उत्तर कोरिया भ्रमणमा गएका पर्यटकहरु बस दुर्घटनमा परेको छ । दुर्घटनामा ३६ जनाको मृत्यु भएको छ । जसमा ३२ जना चिनियाँ नागरिक र ४ जना उत्तर कोरियाका रहेका छन् ।
आइतबार राति प्योङयोङको दक्षिणतर्फ रहेको उत्तर ह्वान्गे क्षेत्रमा चिनियाँ पर्यटक सवार टुरिस्ट बस पुलबाट खस्दा सो दुर्घटना भएको रोयटर्सले जनाएको छ ।
राति नै यसबारे जानकारी गरिएपछि उत्तर कोरियामा रहेको चिनियाँ दूतावासका अधिकारीहरुले घटनास्थलमा पुगी मन्त्रालयलाई खबर गरेका थिए । त्यसपछि उद्धार कार्यका लागि त्यसैसमयदेखि आपत्कालिन् सेवा सुरु गरिएको बताइएको छ ।
त्यसैले बसमा सवार चिनियाँ नागरिकहरुको पहिचान र दुर्घटनाको क्षतिबारे थप विवरण आउने क्रम जारी रहेको मन्त्रालायले बताएको छ । उत्तर कोरियाको राष्ट्रिय सञ्चारले भने अहिलेसम्म यसबारे कुनै खबर गरेको छैन ।
उत्तर कोरियासँग सबैभन्दा नजिकको सम्बन्ध राख्ने हुनाले पनि हरेक वर्ष उत्तर कोरिया पुग्ने थोरै पर्यटकहरुमा अधिकांश चिनियाँ हुने गरेको पाइन्छ । शुक्रबार दक्षिण कोरियाली राष्ट्रपति मुन जे इनसँग हुन गइरहेकोे बैठकको तयारीका लागि गत हप्तादेखि नै केसङ र प्योङयोङबीचको उक्त हाइवेमा सडक निर्माण एवम् मर्मतका कार्य भइरहेको एनके न्युजले बताएको छ । यसका साथै कोरियाली प्रायद्विपमा हावाहुरी र भारी वर्षा पनि भइरहेको हुँदा मौसमका कारण पनि दुर्घटना भएको हुन सक्ने बताइएको हो ।