एजेन्सी । नेपाली राष्ट्रिय टोलीका सदस्य सन्दीप लामिछाने रहेको दिल्ली डेयरडेभिल्सले इन्डियन प्रिमियर लिग क्रिकेट (आइपीएल) मा आज किंग्स इलाभेन पन्जाबसँग प्रतिस्पर्धा गर्दैछ  ।

दिल्ली र पन्जाबबिचको खेल दिल्लीस्थित फिरोज साह कोट्ला स्टेडियममा हुने छ  । नेपाली समयअनुसार सवा ८ मा सुरु हुने खेलमा दुवै टोली जित निकाल्ने लक्ष्यमा मैदान उत्रनेछन् । दिल्लीले जारी सिजन पहिलो होम खेल खेल्न लागेको हो ।

यो खेल दुवै टोलीको लागि महत्वपूर्ण रहेको छ । तर, घरेलु टोली दिल्लीलाई यो खेल बिशेष महत्वपूर्ण रहेको छ । खराब लयमा रहेको दिल्ली पन्जाबविरुद्ध जित निकाल्दै लय समात्न चाहन्छ  । पन्जाब भने दिल्लीलाई दोस्रो पटक हराउदै लिगको शीर्ष स्थानमा उक्लन चाहन्छ  ।

दिल्ली पहिलो खेलमा पन्जाबसँग उसैको मैदानमा ६ विकेटले हारेको थियो । आज दिल्ली पन्जाबसँग पहिलो खेलमा बेहोरेको हारको बदला लिने योजनामा हुने छ । तर, ब्याटिङ लाइन मजबुद रहेको पन्जाबविरुद्ध दिल्लीलाई सहज भने छैन ।

किनकी पछिल्लो समय पन्जाबले निकै उत्कृष्ट प्रदर्शन गरिरहेको छ । पन्जाबले पाँच खेलमा ४ जित निकालेर लिगको दोस्रो स्थान ओगटेको छ । पन्जाबका क्रिस गेल, लोकेश राहुल,मायांक अग्रवाल जस्ता खेलाडीको प्रदर्शन उच्च रहेको छ ।

यता, दिल्लीको प्रदर्शन भने ठिक उल्टो रहेको छ । दिल्लीले पाँच खेलमा एक खेल मात्र जितेको छ । २ अंक जोडेको दिल्ली पुछारमा रहेको छ । आज दिल्ली पन्जाबविरुद्ध जित निकाल्दै आफ्नो अंक तालिका सुधार गर्ने योजनामा हुने छन् ।

दुई टोलीबीचको पछिल्लो नतिजा हेर्दा दिल्ली भन्दा पन्जाब अघि रहेको छ । दिल्लीले पन्जाबसँग घरेलु मैदानमा खेलेको पाँच खेलमा २ खेल मात्र जितेको छ । दिल्ली घरेलु मैदानमा पन्जाबसँग ३ खेलमा पराजित भएको छ ।

यस्तै दिल्लीको टोलीमा रहेका लेग स्पिनर सन्दिपले मैदान उत्रने मौका पाएका छैनन् । अघिल्ला पाँच खेलमा टिममा पर्न असफल पन्जाबविरुद्ध पनि सन्दिप दिल्लीमा टिममा पर्ने संभवाना न्यून रहेको छ । किनकि चार मात्र विदेशी खेलाडी मैदान उतार्न मिल्ने खेलमा सन्दिप भन्दा अब्बल विदेशी खेलाडी दिल्लीको टिममा रहेको छ । दिल्लीका भेट्रान स्पिनर अमित मिश्रले समेत पहिलो खेलबाहेक अन्य खेलमा मैदान उत्रन पाएका छैनन् ।

दिल्लीको टिममा पर्न सन्दिपले ग्लेन म्याक्श्वेल, क्रिस मोरिस, ड्यानियल क्रिस्टेयन,  जासन रोय, ट्रेन्ट बोल्ट, कोलिन मुनरो र लिआम प्लुंकेट जस्ता नाम चलेका विदेशी खेलाडीलाई पछि पार्न सक्नु पर्छ । तर, विदेशी खेलाडीको प्रदर्शन एकनास नहुँदा र घरेलु मैदानको पिच स्पिनरलाई फाइदा पुग्ने हुँदा दिल्लीले सन्दिपलाई आज टिममा उतार्ने सम्भावना भने रहेको छ ।