काठमाडौं । नेपाली राष्ट्रिय टोलीका सदस्य सन्दिप लामिछाने रहेको टिम दिल्ली डेयरडेभिल्सले इन्डियन प्रिमियर लिग (आईपीएल) क्रिकेटमा पाहुना टोली किंग्स इलाभेन पन्जाबबिरुद्ध पहिले बलिङ गर्ने भएको छ ।

दिल्लीस्थित फिरोज साह कोट्ला स्टेडियममा दिल्लीले टस जितेर पहिले बलिङ गर्ने निर्णय गरेको हो । टस हारेको पन्जाबले केहि बेरमा ब्याटिङ थाल्ने छ ।

यो खेल दुवै टोलीको लागि महत्वपूर्ण रहेको छ । तर, घरेलु टोली दिल्लीलाई यो खेल बिशेष महत्वपूर्ण रहेको छ । खराब लयमा रहेको दिल्ली पन्जाबविरुद्ध जित निकाल्दै लय समात्न चाहन्छ  । पन्जाब भने दिल्लीलाई दोस्रो पटक हराउदै लिगको शीर्ष स्थानमा उक्लन चाहन्छ  । लिगमा दिल्ली २ अंक जोडेर पुछारमा रहदा पन्जाब ८ अंक जोडेर दोस्रो स्थानमा रहेको छ ।

यता, पहिलोपटक आईपीएल टिममा परेका नेपाली लेग स्पिनर सन्दिप आजपनि दिल्लीको प्लेइङ सेटमा परेका छैनन् । अघिल्ला पाँच खेलमा टोलीमा नरहेका सन्दिपलाई दिल्लीले घरेलु मैदानमा हुने पन्जाबबिरुद्धको खेलमा समेत टोलीमा नराखेको हो । 

चार विदेशी खेलाडी मैदान उतार्न मिल्ने खेलमा दिल्लीले विदेशी खेलाडीमा लिआम प्लुंकेट, ग्लेन म्याक्सवेल, ट्रेन्ट बोल्ड र ड्यानियल क्रिस्टेयनलाई टिममा राखेको छ । गत फेब्रुअरी २७ र २८ तारिखमा भएको आईपीएलको अक्सनबाट सन्दीपलाई दिल्लीले  २० लाख भारु बेस प्राइजमा आफ्नो टिममा अनुबन्धित गरेको थियो । सन्दीप आईपीएल खेल्ने पहिलो नेपाली क्रिकेट खेलाडी हुन् ।

यू – १९ टोलीका कप्तान समेत रहेका सन्दीप आईपीएल टिम दिल्लीमा आबद्ध भएसँगै सन्दीपको चर्चा चुलिएको थियो । यु–१९ विश्वकप क्रिकेटमा ह्याट्रिक विकेट समेत लिएका सन्दीप नेपालका प्रतिभाशाली खेलाडी हुन् ।