काठमाडौं । नेपाल बंगलादेशमा जारी चौथो एसियन भलिबल कन्फिडिरेसन (एभिसी) सेन्ट्रल जोन सिनियर पुरुष भलिबल च्याम्पियनसिपको सेमिफाइनलमा प्रवेश गरेको छ ।
मिरपुरस्थित ढाका कवर्डहलमा सोमबार घरेलु टोली बंगलादेशले माल्दिभ्सलाई ३–० को सोझो सेटमा पराजित गरेपछि नेपाल समुह ‘ए’ को उपविजेता बन्दै सेमिफाइनलमा पुगेको हो । बंगलादेशले माल्दिभ्समाथि २५–१५, २५–१५ र २५–२२ को सहज जित निकालेको थियो । माल्दिभ्सलाई हराएसँगै बंगलादेश समूह विजेताको रुपमा अन्तिम चारमा पुगेको छ ।
च्याम्पियनसिपमा नेपाल समूह चरणको पहिलो खेलमा बंगलादेशसँग ३–१ को सोझो सेटमा पराजित भएको थियो । तर, माल्दिभ्सलाई ३–० कै सोझो सेटमा पराजित गर्दै नेपालले सेमिफाइनल पुग्ने सम्भावना जीवितै राखेको थियो । यस्तोमा सोमबार बंगलादेशले माल्दिभ्सलाई पराजित गरेसँगै नेपालले सेमिफाइनल यात्रा तय गरेको हो ।
अब नेपालले सेमिफाइनलमा समूह ‘बी’को विजेता तुर्कमेनिस्तानको सामना गर्नेछ । नेपाल र तुर्कमेनिस्तानबिचको खेल बुधबार हुनेछ ।
सेन्ट्रल जोनमा नेपालको यो लगातार चौथो सहभागिता हो । नेपालले दुई बर्षअघि माल्दिभ्समा सम्पन्न तेस्रो संस्करणको च्याम्पियनसिपमा कास्य पदक जित्दै ऐतिहासिक सफलता पाएको थियो । पछिल्लो चार दशकबाट निरन्तर अन्तर्रा्िष्ट्रय भलिबलमा सहभागिता जनाउँदै आएको नेपाली पुरुष भलिबल टोलीले जितेको त्यो नै पहिलो पदक थियो ।
चौथो संस्करणको प्रतियोगितामा ६ टोलीको सहभागिता छ । समूह ‘बी’ मा किर्गिस्तान, उज्बेकिस्तान र तुर्कमेनिस्तान छन् ।
