काठमाडौं । नेपाल टेलिकमले विभिन्न अस्पताललाई कम्बल ताथ केही सामुदायिक विद्यालयमा आइसीटी सेन्टर स्थापना गरेको छ । कम्पनीले चौधौं वार्षिकोत्सवको अवसरमा घोषणा गरेअनुरुप संस्थागत सामाजिक उत्तरदायित्व कार्यक्रमअन्तर्गत सहयोग उपलब्ध गराएको हो ।

कम्पनीले आफ्ना ६ वटा क्षेत्रीय निर्देशनालय अन्तर्गत एक÷एक स्थानका अस्पतालमा कम्बल वितरण गरेको हो । जसअनुरुप कोशी अञ्चल अस्पताल, विराटनगर, नारायणी अञ्चल अस्पताल, वीरगञ्ज, भक्तपुर क्यान्सर अस्पताल, भेरी अञ्चल अस्पताल नेपालगञ्ज र महाकाली अञ्चल अस्पताल, महेन्द्रनगरलाई २५÷२५ थान कम्बल पाएका हुन् । कम्पनीले उदयपुरको उदयपुरगढी गाउँपालिकाको वडा नम्बर ६ का अग्निपीडित स्थानीय वासिन्दालाई पनि २५ थान कम्बल वितरण गरेको छ । 

नेपाल टेलिकमका प्रबन्ध निर्देशक कामिनी राजभण्डारीले एक कार्यक्रमकाबीच भक्तपुर क्यान्सर अस्पतालका निर्देशक डा. ऋषिकेशनारायण श्रेष्ठलाई कम्बल हस्तान्तरण गरिन् । 

सो अवसरमा राजभण्डारीले कम्पनीले आगामी दिनमा सहयोगको दायरा अझ फराकिलो पार्न सकिने बताइन् । 

त्यसैगरी भूकम्पबाट अति प्रभावित जिल्लालगायत अन्य ६ वटा जिल्लाका एक÷एक वटा सामुदायिक विद्यालयमा आइसीटी सेन्टर स्थापना गरिदिने कम्पनीको कार्यक्रम अनुसार भूकम्प प्रभावित ११ वटा जिल्लामा कार्य सम्पन्न भइसकेको छ । त्यसैगरी लमजुङ, डडेलधुरा, उदयपुर, जुम्ला र रुकुम जिल्लाका एक एक सामुदायिक विद्यालयमा निकट भविष्यमा नै आइसीटी सेन्टर स्थापनाका लागि तयारी अन्तिम चरण पुगेको कम्पनीले जनाएको छ ।

टेलिकम प्रबन्ध निर्देशक राजभण्डारीले भक्तपुरस्थित शान्ति निकेतन माध्यमिक विद्यालय आईसीटी सेन्टरको शुभारम्भ गरिन् । उक्त सेन्टरका लागि कम्पनीले ५ थान कम्प्युटर, ५ थान वेब क्याम, ५ थान माइक्रो फोनसहितको हेडसेट र १ थान थ्री इन वान प्रिन्टर उपलब्ध गराएको छ । सो प्रयोजनका लागि १ लाइन वाइम्याक्स डाटा कनेक्सन, वाइफाई राउटर र ओडियू सेट समेत उपलब्ध गराउनुको साथै इन्टरनेट चलाउनका लागि दुई वर्षसम्म मासिक रुपमा ३० जीबी डाटा  निःशुल्क उपलब्ध गराएको छ ।