संगठितरुपमा सुन तस्करीका घटनामा एकपछि अर्को वरिष्ठ प्रहरी अधिकारी मुछिएपछि प्रश्न उठेको छ – लहरो तान्दा पहरो गर्जने त होइन ?
यो समाचार आजको कान्तिपुर दैनिकमा जनकराज सापकोटाले लेखेका छन् । अनलाइन सञ्चारमाध्यमले यो समाचारलाई दैनिकरूपमा उठाएको भए पनि दैनिक पत्रिकाले भने ढिलागरी यो विषय उठान गरेका छन् ।
गत माघ ९ मा त्रिभुवन अन्तर्राष्ट्रिय विमानस्थल हुँदै बाहिरिएको तस्करीको साढे ३३ किलो सुन ओसारपसारका क्रममा हरायो । त्यही सुन खोज्ने क्रममा मोरङ, उर्लाबारीका सनम शाक्यको हत्या भएपछि यो प्रकरण सार्वजनिक भएको थियो । अहिलेसम्म उच्च प्रहरी अधिकारीसहित २० जनालाई पक्राउ गरी अनुसन्धान गरिरहेको विशेष समितिले घटना खोतल्दै जाँदा संगठित जालो क्रमशः खुल्दैगएको कान्तिपुर दैनिकमा समाचार छ ।
कान्तिपुर दैनिकले माघ ९ देखि कहिले के भयो ? भन्ने शीर्षकमा घटनाक्रमसहित यो समाचार प्रकाशित गरेको छ । नयाँ पत्रिका दैनिकले पनि तस्करको साढे ३३ किलो सुनले हत्या र आत्महत्याको शृंखला शीर्षकमा समाचार लेखेको छ ।
थाइ एयरका प्राविधिकले विमानस्थलमै आत्महत्या गरेको, काठमाडौंमा अपहरण मोरङमा यातना, प्रहरी कसरी मुछियो ? एसपी र डीआईजी नै अनुसन्धानको घेरामा, आरोपीका आफन्तले गुहारे गृहमन्त्री, योजनाकार र सुन बेपत्तालगायतका सबहेड राखेर समाचार तयार पारेको छ ।
टेकराज थामीले लेखेको यो समाचारसँगै नयाँ पत्रिकामा कृष्ण रिजालले लेखेको समाचारअनुसार सातामा डेढसय किलो सुन यसरी नै तस्करी भइरहेको छ ।
त्यसैगरी पञ्चायतदेखि नै सुन र शक्तिको सम्बन्ध शीर्षकमा सुजित महतले समाचार लेखेका छन् । प्रजातन्त्रकालका गृहमन्त्री खुमबहादुर खड्काका साथै वामदेव गौतम र अर्थमन्त्री रवीन्द्रनाथ शर्मा सुन तस्करीलाई सघाएको विवादमा परिरहेको समाचारमा उल्लेख छ ।
नागरिक दैनिकले पनि तेस्रो पृष्ठमा प्रहरीकै उच्च अधिकारी समातिन थालेको भन्दै समाचार प्रकाशित गरेको छ ।
अन्य समाचार
आजको नागरिक दैनिकले प्रधानमन्त्री ओलीको धरहरा पुनर्निर्माण नारामै सीमित भएको भन्दै उनले दुई वर्षअघि पनि अहिलेजस्तै भाषण गरेको उल्लेख गर्दै समाचार लेखेको छ । विसं २०७२ फागुन ४ मा धरहरा पुनर्निर्माणका लागि उनले गरेको प्रतिबद्धता र २०७५ वैशाख १२ गते गरेको प्रतिबद्धता उस्तै रहेको नागरिक दैनिकमा हिमाल लम्सालले लेखेको समाचारमा उल्लेख छ ।
अन्नपूर्ण पोस्टले २०७२ को भूकम्पमा ज्यान गुमाएकाहरुको सम्झनामा पशुपतिनाथ मन्दिर अगाडि दीप प्रज्वलन गरिँदै गरेको तस्बिरलाई पहिलो पृष्ठमा स्थान दिएको छ । सरकारी निकायले नै बक्यौता नतिर्ने भन्दै अर्को समाचार प्रकाशित छ ।
नेपाली धनी भए
आजका सबैजसो पत्रिकाले नेपालीको प्रतिव्यक्ति आय बढेको उल्लेख गर्दै समचार प्रकाशित गरेका छन् ।
अन्नपूर्ण पोस्टले यससम्बन्धी समाचारको ग्राफिक्ससहित समाचार तयार पारेको छ । नेपालीको प्रतिव्यक्ति वार्षिक आय ११ हजार तीन सय चार रूपैयाँले बढेको छ । तथ्यांक विभागले गतवर्षको प्रतिव्यक्ति आय ९२ हजार ३१ रुपैयाँबाट बढेर यसवर्ष १ लाख ३ हजार ३ सय रुपैयाँ पुगेको जनाएको छ ।
नयाँ पत्रिका, कान्तिपुर, नागरिक, राजधानी, हिमालय टाइम्स लगायतका पत्रिकाले यो समाचारलाई प्राथमिकताका साथ प्रकाशित गरेका छन् । हिमालय टाइम्सले भग्नावशेष अवस्थामा रहेको धरहराको तस्बिरलाई पहिलो पृष्ठमा प्रकाशित गरेको छ ।
थुनामा रहेका सांसद् निलम्बनमा पर्ने कि नपर्ने ?
तीन वर्षभन्दा बढी कैद सजाय हुने फौजदारी मुद्दामा पुर्पक्षका लागि थुनामा रहेका सांसद निलम्बन हुने वा नहुने प्रावधानमा दलहरुबीच विवाद हुँदा प्रतिनिधिसभा नियमावली मस्यौदाको कार्य प्रभावित बनेको छ । निलम्बन गर्नुपर्ने पक्षमा एमाले र माओवादी उभिएका छन् भने कांग्रेस र राजपा निलम्बनको विपक्षमा रहेको आजको गोरखापत्रमा समाचार प्रकाशित छ । कान्तिपुर दैनिकमा पनि राजेश मिश्र र मकर श्रेष्ठले यो विषयमा समाचार लेखेका छन् ।
विचार र दृष्टिकोण
आजको कान्तिपुर दैनिकमा राष्ट्रसंघका पूर्व उपमहासचिव ज्ञानचन्द्र आचार्य लेख्छन् – छिमेकमा र अन्यत्र अब हामीले पनि स्पष्ट दृष्टिकोण र कार्यक्रम, सक्रिय गतिविधि, सबल संस्थागत विकास र स्रोत र साधनको समुचित प्रयोग गरी बृहत्तर राष्ट्रिय स्वार्थको बढोत्तरी गर्नुको विकल्प छैन ।
अन्नपूर्ण पोस्टमा श्याम श्रेष्ठ लोकतन्त्रका १२ वर्ष शीर्षकमा लेख्छन् – बदलिएको राजनीतिक प्रणाली र नबदलिएको राजनीतिक नेतृत्वको चरित्र समकालीन नेपाली राजनीतिको सबैभन्दा ठूलो विरोधाभाष भइरहेछ जसका कारण आम नागरिकले अहिले पनि परिवर्तनको अनुभूति गर्न सकेका छैनन् ।
आजको नागरिक दैनिकमा कृष्णमुरारी भण्डारी लेख्छन् – आफूमाथि आक्रमण हुँदा ओली कांग्रेसलाई कसेर दनक दिन्छन् तर प्रचण्ड त्यसो गर्न सक्दैनन् किनभने भोलि ऊसँग मिल्नुपर्छ कि भन्ने सोचले उनी आक्रान्त छन् । तर सत्य कुरा के हो भने एमालेसँग गठबन्धन नगरेर चुनाव लडेको भए माओवादी के हुन्थ्यो होला ?
सम्पादकीय
कान्तिपुर दैनिकले पुनर्निर्माणमा भइरहेको पट्यारलाग्दो कामको बारेमा सरकारको ध्यानाकर्षण गराउँदै सम्पादकीय लेखेको छ । पीडितको समस्याप्रति सरकार गम्भीर छैन भन्ने संरचना पुनर्निर्माणमा देखिएको ढिलासुस्तीले देखाएको सम्पादकीयमा उल्लेख छ ।
कांग्रेसको समीक्षा शीर्षकमा नयाँ पत्रिका दैनिकले सम्पादकीय लेख्दै भनेको छ – सभापतिसहितको नेतृत्व निर्वाचन समीक्षा टालटुल गरेर टार्न चाहन्छ । वास्तविक कारण खोतल्दा आफ्नै कमजोरी उधिनिने र नेतृत्वको वैधतामाथि प्रश्न उठ्ने भयले यो पंक्ति ग्रस्त छ ।
गोरखापत्र दैनिकले वैदेशिक रोजगारीमा सुधार शीर्षकमा सम्पादकीय लेखेको छ।
हिमालय टाइम्सले तस्करीको जालो छिचोल्ने चुनौती शीर्षकमा सम्पादकीय लेख्दै भनेको छ – ३३ किलो सुनको पछिल्लो घटनाको अनुसन्धान र कारबाही तस्करी नियन्त्रणमा महत्वपूर्ण हुनेछ । यस अर्थमा चुनौतीपूर्ण पनि छ ।
अन्नपूर्ण पोस्टले कांग्रेस सुधार्ने सूत्र शीर्षकमा सम्पादकीय लेख्दै विशेष महाधिवेशन बोलाउनु नै कांग्रेसको पुनर्जीवनका लागि अत्यावश्यक रहेको उल्लेख गरेको छ ।
नागरिक दैनिकले पनि पुनर्निर्माण निराशापूर्ण रहेको भन्दै सम्पादकीय लेखेको छ ।
