एजेन्सी । केही महिनाअघि कानूनी निरीक्षणमा परेको फेसबुकले आफ्नो प्रविधिमा सुधार ल्याउँदै पछिल्लो तीन महिनामा २ करोड भन्दा बढी नग्नता लगायतका यौनजन्य सामग्रीहरु हटाएको कम्युनिटी स्ट्यान्डर्ड इन्फोर्समेन्ट रिपोर्टले जनाएको छ । मंगलबार सार्वजनिक गरिएको यस रिपोर्टमा फेसबुकको नीति विपरित हिंसाजन्य, आतङ्क फैलाउने खालका, घृणात्मक सन्देश र फेक अकाउन्टलाई नियन्त्रणमा लिइएको सिएनएनले जनाएको हो ।
यस अन्र्तगत कम्पनीले फेसबुकमा देखा पर्ने कूल १० हजार सामग्रीलाई हटाइसकेको छ जसमध्ये सबैभन्दा धेरै नग्न र यौनजन्य पोस्टहरु भेटिएको बताइएको हो । यसअघि फेक अकाउन्टको समस्या हटाउनप्रति मात्र केन्द्रित रहँदै फेसबुकले थुप्रै नयाँ नीति लागू गरेको थियो । त्यसै क्रममा फेसबुकले तीन महिना भित्रै ५८ करोड फेक अकाउन्ट निस्क्रिय गरिसकेको बताएको छ । तर फेक अकाउन्टका साथै अन्य समस्याका कारण पनि व्यापक रुपमा आलोचित हुनु परेपछि फेसबुकले हिंसा भड्काइ गलत सन्देश फैलाउने खालका २५ लाख र गलत प्रवृत्तिका ८७ करोड पोस्टहरु समेत हटाएको हो ।
फेसबुकको प्रविधिमा अझै गलत सन्देश पत्ता लगाउने प्रणाली पूर्ण रुपमा तयार नभएकाले कम्पनीका कर्मचारीहरु आफैँले त्यसको निरीक्षण गरिरहेको फेसबुकका सामग्री व्यवस्थापक रोजेनले बताएका हुन् । त्यसैगरी फेसबुकले ३५ लाख अन्य अकाउन्टहरुलाई पनि हिंसागत् सामग्रीबारे चेतावनी दिइसकेको बताएको छ । तरपनि अहिले फेसबुक आफैँले त्यस प्रकारका पोस्टमा अटोमेटिक चिन्ह लगाइदिने गरेकाले हटाउन सजिलो भएको रोजेनले बताए ।
अर्कोतर्फ गम्भीर आरोप र चौतर्फी आलोचनाको शिकार भएपछि फेसबुकमा सरकारको तर्फबाट अकाउन्ट र डाटाबारे निरीक्षणको रिक्वेस्ट आउने क्रम भने धेरै वृद्धि भएको बताइएको छ । अमेरिकामा मात्र थोरै समयमै सरकारी पक्षबाट ८२ हजार भन्दा धेरै डाटा रिक्वेस्ट आइसकेको फेसबुकले बताएको हो । तरपनि कम्पनीले सरकारका तर्फबाट आएका प्रत्येक रिक्वेस्टहरुको ध्यानपूर्वक अध्ययन गर्ने गरेकाले कुनै समस्या नभएको बताएको छ ।
