देश

गुण्डालाई शिर उठाउन दिन्न : एसपी राठौर

चितवन । चितवनका प्रहरी प्रमुख एसपी सुशीलसिंह राठौरले आफ्नो पहिलो निशाना नै गुण्डागर्दी नियन्त्रण गर्ने रहेको बताएका छन् ।
बुधबार चितवनमा पदभार ग्रहण गर्दै एसपी राठौरले चितवन अन्य जिल्लाभन्दा फरक रहेको आफूले जानकारी पाएको भन्दै गुण्डाहरुको नाम लिस्ट लिएर उनीहरुमाथि कडा निगरानी गर्ने बताए ।
उनले भने, “एक प्रहरी प्रमुख सरुवा हुने र अर्को भर्खरै आएको अवस्थामा गुण्डाहरु बढी चल्मलाउने गर्छन् । तर, म शिर उठाउन दिन्न ।”
प्रहरीमा रेकर्ड रहेकाहरुको सूचीअनुसार सबै किसिमका निगरानी बढाउने  तर आफ्नै पेसा व्यवसाय गरी बसेका तथा सुध्रिएकालाई केही नगरिने उनले बताए ।
राजनीति वा गैरराजनीतिक हिसावमा आपराधिक समूह बनाएर बसेका जोसुकैलाई नछाडिने एसपी राठौरले बताए । अपराध नियन्त्रणका लागि प्रहरी र जासुस दुवैको भरपुर प्रयोग गर्ने उनले बताए ।
दार्चुला, अछामको जिल्ला प्रमुख र कालिमाटी वृत्त प्रमुख भएर काम गरिसकेका एसपी राठौर अख्तियार दुरुपयोग अनुसन्धान आयोग महोत्तरी, बर्दिवासबाट चितवन प्रहरी प्रमुखको रुपमा सरुवा भई चितवन आएका हुन् ।
उनले समाजलाई अपराधमुक्त राख्न आमनागरिकको पनि उत्तिकै कर्तव्य रहने बताए । समाजमा हुने आपराधिक गतिविधि र घटनाबारे समयमै जानकारी दिन उनले नागरिकसँग आग्रहसमेत गरे ।
बालबालिका तथा महिलामाथि हुने हिंसा, जुवा, अवैध यौनजन्य गतिविधि र लागुऔषध नियन्त्रणमा आफ्नो विशेष ध्यानकेन्द्रित रहने उनले बताए ।

तपाईंको मत