काठमाडौं । सन्दीप लामिछाने नेपालका त्यस्ता प्रतिभाशाली खेलाडी हुन्, विश्वका आक्रमक र स्टार खेलाडी पनि सन्दीपको बलिङमा ब्याटिङ गर्न डराउँछन् । इन्डियन प्रिमियर लिग (आईपीएल) क्रिकेटमा विश्वका स्टार खेलाडीहरू सन्दीप लामिछाने विरुद्ध निरिह बने ।
आफ्नो पूरै चार ओभर बलिङ गरेका सन्दीपले २१ रन खर्चे भने महत्वपूर्ण १ विकेट लिए । चर्चित र आक्रमक खेलाडीको नामले चिनिने भारतीय खेलाडी सुरेश रैनालाई सन्दीपले आउट गरेपछि क्रिजमै रहेका पूर्व भारतीय कप्तान तथा चेन्नाई सुपर किंग्सका कप्तान महेन्द्रसिंह धोनी पनि झस्किए ।
धोनीले सन्दीपको ७ बलको सामना गरे भने ५ रन मात्रै बनाए । धोनीले सन्दीपका कुनै पनि बलमा ठूला सर्ट प्रहार गर्न सकेनन् । उनले ५ रन एक–एक गरेर बनाएका थिए भने दुई बल डट खेलेका थिए ।
यता, अष्ट्रेलियन खेलाडी शेन वाट्सनले पनि सन्दीप लामिछानेको बलिङलाई ठम्याउन सकेनन् । वाट्सनले सन्दीपको पहिलो पूरै ओभर खेले । तर, सन्दीपको ६ बलको सामना गरेका वाट्सनले २ रन मात्रै बनाउन सके ।
सन्दीपले आफ्नो पहिलो ओभरमा मात्र २ रन दिएका थिए । त्यस्तै, दोस्रो बलमा सन्दीपले ६ रन खर्चेका थिए । आफ्नो तेस्रो ओभरको पहिलो बलमा नै विकेट लिएका सन्दीपले यो ओभरमा पनि २ रन मात्रै खर्चेका थिए । सन्दीपले आफ्नो अन्तिम ओभरमा अर्थात चौथो ओभरमा भने ११ रन र्खेचेका थिए । जसमा रविन्द्र जडेजाले सन्दीपलाई एक छक्का प्रहार गरेका थिए ।