गत साताको पहिलो दिन नेपालका दैनिक पत्रिकामा भारतका प्रधानमन्त्री नरेन्द्र मोदी नेपाल आएर फकेका समाचारले सबैभन्दा धेरै महत्त्व पाएका थिए । तर, सप्ताहान्तमा पुग्दा भारतको आईपीएलमा खेल्दै रहेका नेपाली खेलाडी सन्दीप लामिछानेको दुई विकेटको समाचार तथा नेपाल कम्युनिस्ट पार्टी गठनको समाचारले पत्रिकामा धेरै महत्त्व पाए । 

पहिले मोदीको विषयमा जाऊँ । मोदी भ्रमणको विषयमा धेरै पत्रिकाले धेरै समाचार प्रकाशित गरे पनि नयाँ पत्रिकाले गत साताको आइतवार दिएको शीर्षकमा सम्पादकको भावना झल्किएको थियो । ‘आए मोदी, गए मोदी’ शीर्षकको समाचारको दोस्रो शीर्षकमै नयाँ पत्रिकाले भ्रमणलाई कसरी हेर्दछ भन्ने झलक आएको थियो । सो पत्रिकाको दोस्रो शीर्षकमा लेखिएको थियो, ‘हरेक भ्रमणमा जस्तै पुरानै एजेन्डा दोहो¥याएर फर्किए भारतीय प्रधानमन्त्री’ ।  

मोदीको भ्रमणका सन्दर्भमा गोरखापत्र, राजधानी, कान्तिपुर तथा नागरिकले सम्पादकीय टिप्पणी गरेका थिए । गोरखापत्रले नेपाल–भारतबीचको सम्बन्ध जति निकट छ, त्यति नै समस्याग्रस्त पनि छ भन्दै खुला सीमाका कारण सिर्जित समस्या, व्यापार घाटा, भारतमा प्रतिबन्धित पाँच सय र एक हजारका भारतीय रुपियाँ सटही, ग्यास बुलेट सञ्चालन, जलविद्युत व्यापार, वस्तु निर्यातमा अवरोध जस्ता समस्या जस्ताको तस्तै रहेको बताएको छ । तर, यी समस्या हुँदाहुँदै पनि रक्सौल–अमलेखगन्ज पाइपलाइन, रेलमार्ग, अरुण तेस्रो जलविद्युत् आयोजना शिलान्यासआदि सकारात्मक पक्ष भएको बताएको छ । राजधानीले पनि मोदी भ्रमणको विषयमा सम्पादकीय लेख्दै भनेको छ, यस भ्रमणको क्रममा प्रदेश २ का मुख्य मन्त्रीको रोइलोबाहेक अति विरोध र अति भक्तिभाव दुवै रहेन । आगामी ६ महिनाभित्रमा दुई देशबीचका विगतमा रोकिएका सबै काम सम्पन्न गर्ने विषयमा मोदी सहमत भएको विषयलाई राजधानीले महत्त्वपूर्ण मानेको छ । नागरिकले भने संविधान सभाले जारी गरेको संविधानलाई जानकारीमा मात्र लिएर नेपालविरुद्ध नाकाबन्दी गरेको भारतले यसपल्ट नेपालको निर्वाचनको प्रशंसा गर्नुलाई संविधानको स्वीकोरोक्तिका रूपमा हेरेको छ । कान्तिपुरले पछिल्लो भ्रमणलाई द्विदेशीय सम्बन्धमा विश्वास निर्माणका दृष्टिले सफल भएको देखेको छ । 

मोदी भ्रमणको समाचारले सोमवारका पत्रिकामा पनि त्यतिकै स्थान पाए । मोदीलाई ओलीले सोधेको प्रश्नलाई नागरिकले मुख्य समाचार बनायो । ‘नेपालको भूमि भारतीय बाँधको कारण डुब्दा यहाँको मन दुख्दैन?’ भनेर ओलीले मोदीलाई प्रश्न गरेको र मोदीले यी समस्या समाधानका लागि अग्रसरता जनाउने बताएका थिए । कान्तिपुरले भने प्रधानमन्त्री ओली प्रदेश नं २ का मुख्यमन्त्री लालबाबु राउतले दिएको संविधान विरोधी अभिव्यक्तिप्रति असन्तुष्ट भएको समाचार मुख्य बनाएर प्रकाशित गरेको थियो । राजधानीले पनि ओलीले भारतसँग बराबरी स्तरमा सम्बन्ध भएको दाबी गरेको समाचारलाई मुख्य बनायो । सँगै राजधानीले अरुण तेस्रोको शिलान्यासमा माओवादी रुष्ट भएको विषयलाई रंगीन बक्स बनाएको थियो । कान्तिपुरले यही विषयलाई ‘कूटनीतिक मर्यादाको बेवास्ता’ शीर्षक दिएर सम्पादकीय लेखेको थियो । नयाँ पत्रिकाले पनि अभिनन्दनको मञ्च प्रयोग गरेर मुख्य मन्त्री राउतले आन्तरिक राजनीतिमा हस्तक्षेप गर्न आमन्त्रण गरेको विषयलाई जायज मान्न सकिन्न भनेको थियो । मोदीको अभिनन्दनमा नेपाली प्रेसलाई सभा गृहभित्र प्रवेश गर्न नदिएको विषयलाई नागरिकले विरोध गर्दै सम्पादकीय लेखेको थियो । 

आक्रोशित गगन र अस्ताएका मणि

गत साताको मंगलवारको पत्रिकामा मुख्यतः दुई विषयले विशेष स्थान पाए । पहिलो नेपालका म्याराडोना भनिएका मणि शाहको निधनको समाचार थियो । धेरै पत्रिकाले मणिविक्रम शाहको निधनमा शोक प्रकट गरे । नागरिकले यो समाचारलाई एन्करमा प्रकाशित गर्यो, कान्तिपुरले एक कोलम बनायो भने राजधानीले शाहको पार्थिव शरीर र शोकविह्वल परिवारका सदस्यको तस्बिर सहित दोस्रो मुख्य समाचार बनायो । 

त्यसै दिन संसद्मा नेपाली कांग्रेसका युवा नेता गगन थापा आक्रोशित भएको समाचारले महत्त्व पायो । संसद्मा बोल्दै ओलीको सरकारलाई ‘महालम्पसारवादी’ भएको आरोप गगनले लगाए भने देउवालाई लम्पसार पर्दा घुँडा धँसियो भन्ने ओलीको घुँडामा भ्वाङै परेको कटाक्षसमेत गरे । यो समाचारलाई नागरिकले तीन कोलमको मुख्य समाचार बनायो । राजधानीले पनि यो समाचारलाई तीन कोलममा नै राख्यो तर नागरिक जत्ति गगनको भनाइलाई शीर्षकमा महत्त्व दिएन । गोरखापत्रले मुख्यमन्त्री राउतको अभिव्यक्ति कूटनीतिक मर्यादाविपरीत भन्ने समाचारलाई मुख्य बनायो । 

नेकपाको गठन

नागरिकले मंगलवारको पत्रिकामा कम्युनिस्ट एकीकरण प्रक्रिया ‘स्थगन’ भन्ने समाचार प्रकाशित गरेको भोलिपल्टै एकीकरणमा धेरै प्रगति भयो । बुधबारको पत्रिकाले एकीकरण चाँडै हुने संकेत ग¥यो । नागरिकलेनै ‘एकता छिट्टै हुन्छ’ भन्ने शीर्षकमा सानो समाचार बनायो । उता राजधानीले भने बुधबारकै पत्रिकामा ‘एकता विलम्बले एमाले र माओवादी नेता फुर्सदिला’ भन्ने समाचार प्रकाशित ग¥यो । 

अन्य पत्रिकाले यो विषयलाई निकै महत्त्व दिए । गोरखापत्रले मुख्य समाचार बनाउँदै ‘कुनै पनि समयमा पार्टी एकता हुन सक्छ’ शीर्षकमा प्रकाशित ग¥यो । हिमालय टाइम्सले ‘दाहाल र नेपाललाई एकता भाँडिने डर’ शीर्षकमा मुख्य समाचार प्रकाशित ग¥यो । कान्तिपुरले ‘एमाले–माओवादी सम्बन्ध ‘सुध्रिँदै’’ शीर्षकमा मुख्य समाचार बनायो । 

बिहीबार पार्टी एकताको घोषणाको तयारी सुरु भयो । हिमालय टाइम्सले तयारी भन्यो भने नागरिक, नयाँ पत्रिका, गोरखापत्र, कान्तिपुरले एकता हुने घोषणै गरिदिए ।

शुक्रवारका पत्रिका एमाले र माओवादी एकताको समाचारले रंगिए । सबैजसो पत्रिकाले यो समाचारलाई सात वा आठ कोलमको ब्यानर समाचार बनाए । कान्तिपुर तथा नयाँ पत्रिका दुवैले ‘इतिहासकै शक्तिशाली कम्युनिस्ट पार्टी’ भने । अझ नयाँ पत्रिकाको शीर्षकले ‘इतिहासकै शक्तिशाली पार्टी’ भनेर थप उपमा दियो । नागरिकले ‘शक्तिशाली कम्युनिस्ट पार्टी गठन’ शीर्षक दियो भने  गोरखापत्र तथा राजधानीले औपचारिक शीर्षक दिए । गोरखापत्रले ‘नेपाल कम्युनिस्ट पार्टी गठन’ भन्यो भने राजधानीले ‘अन्ततः नेपाल कम्युनिस्ट पार्टी’ भन्ने शीर्षक दियो । हिमालय टाइम्सले सबैभन्दा फरक र सहज शीर्षक दियो, ‘एक भए एमाले र माओवादी’ ।

शनिवार कान्तिपुरका सम्पादक सुधीर शर्माले विश्लेषण लेखे, ‘वाम विमानका दुई पाइलट’ । शर्माले अब कसरी अघि बढ्छ भनेर धेरै टिप्पणी नगरी किन एकीकरणको मनःस्थितिमा दुई नेता पुगे भन्ने विषयमा धेरै शब्द खर्च गरेका छन् । नागरिकले अब नेकपा राज्य संयन्त्रमा पनि शक्तिशाली भएको र ५६ प्रतिशत जनमत पाएको समाचार बनाएको छ । नयाँ पत्रिकाले ओलीको तस्बिरमात्रै प्रकाशित गरेर ओली सरकारका समृद्धि योजना भन्ने शीर्षक दिएको छ । 

सन्दीपको दुई विकेट

नेपालका लेग स्पिनर सन्दीप लामिछाने दिल्ली डेएर डेभिल्सको टिममा धेरै म्याचमा बेन्चमा नै बसे । जब दिल्ली यो प्रतियोगिताबाट बाहिरिने पक्का भयो तबमात्र छनोट समितिले उनलाई ग्राउन्डमा उत्रने मौका दियो । तर, आफूले खेलेको पहिलो खेलमा नै उनले रोयल च्यालेन्जर्स बैंगलोरका एबी डिभिलियर्स तथा भारतका कप्तानका रुपमा खेल्ने विराट कोहलीलाई सामना गरे । उनले चार ओभरमा केवल २५ रन दिएर एक विकेट लिए । यो उनको ठूलो उपलब्धि थियो । त्यो म्याच शनिवार मध्यरातमा सकिएकाले आइतवारका पत्रिकाले प्रकाशित गर्न भ्याएनन् । सोमवार भने केही पत्रिकाले यो समाचारलाई महत्त्व दिएका थिए ।

शुक्रवार राति दिल्लीको खेल चेन्नई सुपर किङ्ससँग भएको थियो । यो म्याचमा पनि उनको सामना भारतका प्रख्यात खेलाडी तथा पूर्व कप्तान महेन्द्र सिंह धोनी तथा सुरेश रैनासँग भएको थियो । सन्दीपले दुवैलाई दबाबमा राख्दै रैनाको विकेट समेत लिन भ्याए । दोस्रो खेलमा पनि उनले निकै सटीक बलिङ गरेका थिए । उनको खेलको विषयमा भारतका प्रख्यात स्पिनर अनिल कुम्बलेले समेत निकै चाख लिएर सल्लाह र प्रतिक्रिया दिए । 

ओझेलमा परेको समाचार

गत साता जेष्ठ २ गते बुधवार मकालु एयरको सिंगल इन्जिन जहाज हुम्लाको बाहुनखर्कमा दुर्घटनाग्रस्त हुँदा जहाजका पाइलट किरण भट्टराई र कोपाइलट आदित्य नेपालीको मृत्यु भएको थियो । मकालु एयरको सो सेस्ना २०८–बी ग्रयान्ड क्याराभान नाइनएन–एजेयु जहाज सुर्खेतबाट बिहान ६ः१५ मा हुम्लाको लागि उडेको थियो । जहाज ६ः५५ मा नपुगेपछि हराएको खबर आएको थियो । यो समाचारलाई धेरै पत्रिकाले अपेक्षित महत्त्व दिएको देखिएन । यो जहाजले हुम्लाका लागि सरसामान बोकेको थियो ।