एजेन्सी । दक्षिण कोरियाका राष्ट्रपति मुन जे इन र ट्रम्पले आइतबार उत्तर कोरियाको विषयमा गम्भीर छलफल गरेका छन् । उत्तर कोरियाको धम्कीपछि आगामी जुन १२ मा तय भएको अमेरिका र उत्तर कोरियाबीचको बैठक सुनिश्चित गर्न अब दुवैले नजिकी सहकार्य गर्ने बताएका हुन् । 

२० मिनेटसम्म फोनवार्तामा मून र ट्रम्पले उत्तर कोरियाका हालका गतिविधिबारे विस्तृत छलफल गरेको राष्ट्रपति कार्यालयले जानकारी दिएको रोएटर्सले जनाएको छ । वास्तवमा उत्तर कोरियाली शाषक किम आफैँले अमेरिकालाई गम्भीर चेतावनी दिँदै ट्रम्पसँगको बैठक रद्द गराउने बताएका थिए । त्यसैले  किमसँगको बैठकपूर्व मून र ट्रम्प आगामी मंगलबार नै ह्वाइटहाउसमा भेट गर्ने भएका छन् ।

ऐतिहासिक अन्तर कोरियाली वार्ता सफल भएको बताइएपनि पछिल्ला केही दिनहरुमा उत्तर कोरियाको व्यवहारमा निकै परिवर्तन आइरहेको देखिएपछि चिन्ता व्यक्त गरिएको हो ।

बिहिबार मात्र उत्तर कोरियाका प्रमुख सल्लाहकार रि सनग्वनले आफूहरुको माग पूरा नभएसम्म दक्षिण कोरियासँग कुनै वार्ता नगर्ने स्पष्ट पारेका थिए । अमेरिकासँगको संयुक्त सैन्य हवाइ अभ्यास रद्द गराएपछि मात्र बैठकको कुरा अघि बढ्ने उत्तर कोरियाको भनाइ छ । 

त्यसैगरी शान्ति सम्झौतामा नयाँ चुनौति थप गर्दै उत्तर कोरियाले रेस्टुरेन्टमा काम गर्ने आफ्ना देशका महिलाहरुलाई पनि दक्षिण कोरियाबाट फर्काइनुपर्ने माग गरेको छ । दुई देशबीचको सम्बन्धलाई नयाँ स्तरमा पुर्याउन यस्तो कदम जरुरी रहेको उत्तर कोरियाको भनाइ छ । वास्तवमा २०१६ मा दर्जनौँ उत्तर कोरियाली महिला कामदारहरु चीन हुँदै दक्षिण कोरिया भागेका थिए । त्यसबेला देखि नै उत्तर कोरियाले दक्षिणमाथि जबरजस्ती आफ्ना नागरिकलाई पक्राउ गरेको आरोप लगाएको छ । उता दक्षिण कोरियाले भने उनीहरु सबै आफ्नै इच्छाले स्वतन्त्र रुपमा दक्षिण बसिरहेको बताउँदै आएको छ । यस विषयले अहिले अमेरिकासँगको बैठकलाई सफल बनाउनमा समेत मूनमाथि थप दबाब पैदा गरेको छ ।