काठमाडौं । इन्डियन प्रिमियर लिग (आईपीएल) क्रिकेटमा सहभागी भएका सन्दीप लामिछाने आज स्वदेश फर्किँदैछन् । सन्दीप नेपाली समयअनुसार दिउँसो ४ बजेर १५ मिनेटमा नेपाल आईपुग्नेछन् ।

सन्दीप जेट एयरलाइन्समार्फत नेपाल आउन लागेका हुन् ।

दिल्ली डेयरडेभिल्सबाट आईपीएल खेलेका सन्दीप मार्च २७ मा भारत गएका थिए । सन्दीपले आईपीएलमा उत्कृष्ट प्रदर्शन गर्दै ३ खेलबाट ५ विकेट लिए । रोयल च्यालेन्जर्स बेंग्लोरविरुद्धको डेब्यु खेलमा प्रभावकारी प्रदर्शन गर्दै ४ ओभरमा मात्र २५ रन खर्चेर सन्दीपले १ विकेट लिएका थिए । त्यस्तै, चेन्नाई सुपर किंग्सविरुद्धको खेलमा अझै उत्कृष्ट प्रदर्शन गर्दै ४ ओभरमा २१ रन खर्चेर १ विकेट लिएका थिए ।

अन्तिम खेलमा साविक विजेता मुम्बई इन्डियन्सविरुद्ध सन्दीपले ३ विकेट लिएका थिए । उनले ४ ओभरमा ३६ रन खर्चेर महत्वपूर्ण ३ विकेट लिएका थिए । यतिबेला सन्दीपको चौतर्फी चर्चा भइरहेको छ ।