काठमाडौं । काठमाडौं उपत्यकामा ट्राफिक लेन उल्लंघन गर्नेको संख्या बढ्दै गएको पाइएको छ । महानगरीय ट्राफिक प्रहरी महाशाखाको तथ्यांकअनुसार चालु आर्थिक वर्षको वैशाख मसान्तसम्म ४ वर्षमा २ लाख ५५ हजार ९ सय २२ जनाले लेन मिचेका छन् । लेन मिच्नेमा पुरुषको संख्या २ लाख ४३ हजार ७ सय ४६ छ भने महिलाको संख्या १२ हजार एक सय ७६ छ । 

ट्राफिक प्रहरी महाशाखाका प्रवक्ता (एसएसपी ) उमेश रञ्जितकारका अनुसार उपत्यकाका दरबारमार्ग र थापाथली क्षेत्रमा सबैभन्दा बढी लेन मिचेको पाइएको छ । एसएसपी रञ्जितकारले ‘टिनएजर्स’हरुले बढी लेन मिच्ने गरेको पाइएको र कतिपय स्थानमा लेन अभावका कारण कारवाही गर्न असहज भएको बताउँछन् । 

ट्राफिक प्रहरी महाशाखाका अनुसार आर्थिक वर्ष ०७१/७२ मा लेन उल्लंघन गर्नेको संख्या ३७ हजार पाँच सय चार छ भने ०७२/७३ मा ४८ हजार ७१ जना कारवाहीमा परेका छन् । यस्तै यस्तै आर्थिक वर्ष ०७३/०७४ मा एक लाख ३१ हजार पाँच सय ३३ जना कार्वाहीमा पर्दा ०७४/०७५ को बैशाख मसान्तसम्ममा ३८ हजार आठ सय १४ जना कारबाहीमा परेको महानगरीय ट्राफिक प्रहरी महाशाखाले जनाएको छ । 

कारवाहीमा परेका सवारी साधनबाट चौथो आर्थिक वर्षको वैशाख मसान्तसम्ममा २५ लाख एक सय २८ रुपैयाँ राजश्वसमेत संकलन भएको छ । काठमाडौं उपत्यकाका ३ जिल्ला काठमाडौं, ललितपुर, भक्तपुरमध्ये सबैभन्दा बढि लेन मिच्ने कार्य काठमाडौंमा बढी भएको पाइएको छ । महाशाखाका अनुसार काठमाडौंको सिंहदरबार, दरबारमार्ग, माइतीघर, थापाथली, भद्रकाली, पुतलीसडकलगायतका स्थानमा अन्य स्थानको तुलनामा बढी लेन नियम मिच्ने काम हुने गरेको छ ।