काठमाडौं । प्रतिपक्षी नेपाली कांग्रेसको भ्रातृ संगठन नेपाल तरुण दलले देशैभरका वडाहरुमा छरिएर रहेका कार्यकर्ताहरुलाई प्रशिक्षण दिने भएको छ । 

कांग्रेस निर्वाचनमा पराजित भएपछि संगठन सुदृढीकरणमा लागेको तरुण दलले कार्यकर्ता प्रशिक्षित गर्न एकै दिन प्रशिक्षण कार्यक्रम आयोजना गर्ने भएको छ । 

वडा–वडामा छरिएर रहेका तरुण दलका युवाहरुलाई प्रशिक्षित गर्न तरुण दलले बैसाख १९ गते देशैभरीका वडाहरुमा एकसाथ ‘वडा स्तरीय प्रशिक्षण कार्यक्रम’ आयोजना गई गइरहेको महासचिव भुपेन्द्रजंग शाहीले जानकारी दिए । 

उनका अनुसार तरुण दलले बैसाख १२ गते ७५३ वटै स्थानीय तहमा नगरपालिका र गाउँपालिका स्तरीय प्रशिक्षण कार्यक्रम तय गरेको छ । तरुण दलले जेठ ५ गतेका दिन एकसाथ ७७ वटै जिल्लाहरुमा ‘जिल्ला स्तरीय प्रशिक्षण कार्यक्रम’ सम्पन्न गरिसकेको छ । यसरी एकै दिन पारेर भइरहेको प्रशिक्षणलाई तरुण दलले कांग्रेसको इतिहासमै पहिलो पटक आयोजना गरिएको दावी गरेको छ । 

तरुण दलले प्रदेश नम्बर १ को झापाबाट शुरु गरेको प्रदेश स्तरीय कार्यकर्ता प्रशिक्षण कार्यक्रमलाई ७ नम्बर प्रदेशको कैलालीमा सम्पन्न गरेको थियो । गत चैत २५ गतेबाट शुरु गरेको उक्त प्रशिक्षण कार्यक्रम बैसाख ३१ गते सम्पन्न भएको थियो ।    

गत फागुन २२–२४ गतेसम्म भक्तपुरको नगरकोटमा सम्पन्न तरुण दलका जिल्ला अध्यक्षहरुको भेलाले संगठनलाई सुदृढ गरेर लैजान प्रशिक्षण कार्यक्रमहरु आयोजना गर्ने निर्णय गरेको थियो ।