काठमाडौं । संसदमा सरकारको आगामी वर्षको नीति तथा कार्यक्रम सार्वजनिक भइसक्दा सेयर बजारको आश भने पुरानै आश राखेको छ । उचित नीतिगत व्यवस्था र संरचनागत समस्याका बीचमा सेयर बजार कमजोर अवस्थामा रहेको बेलामा आउने बजेटले आफ्ना पुरानै माग पुरा गर्ने आशमा सेयर बजार रहेको हो ।
सरकारमा अर्थमन्त्रकिा रुपमा विज्ञ व्यक्तित्व आएसँगै उनका सार्वजनिक अभिव्यक्तिले तर्सिएको सेयर बजार उनै अर्थमन्त्रीसँग बजार सुधारलाई टेवा दिने नीति बजेटमा आउने आश गर्छन् । विषेशगरी केही वर्षअघिदेखि उठेको भ्याटको विवाद र पुँजगित लाभकर विषयमा बजेटमा सम्बोधन हुने आश गरिएको हो ।
नेपाल इन्भेस्टर्स फोरमका महासचिव राजन लम्साल पनि बजेटले भ्याट र पुँजीगत लाभकर विषय लगानीकर्ताको हितमा नीति समेट्ने आशा गर्छन् । सेयर कारोबारवापत् ब्रोकरलाई लिर्नुपर्ने कमिसनमा भ्याट लगाउने कुरा पछिल्लो वर्षदेखि चर्किएको अवस्थामा लगानीकर्ताले यस्तो अपेक्षा राखेको उनले बताए ।
बाह्रखरीसँग कुरा गर्दै उनले भने – “धेरै अपेक्षा त छैन । तर, अर्थमन्त्रीसँगको पटकपटकको भेटपछि हाम्रो माग सम्बोधन हुनेमा हामी विश्वस्त छौं ।”
यसअघि महालेखा परिक्षाको कार्यालयले अघिल्लो वर्ष सेयर वर्ष ब्रोकर कमिसनमा भ्याट नलगाइएको भन्दै अर्थ मन्त्रालयलाई बुरुजु लेखेको थियो । त्यसपछि  आन्तरिक राजस्व कार्यालयले २ ब्रोकर कम्पनीलाई भ्याटमा दर्ता हुन आगह गरेपछि सेयर कारोबार बन्द हुनेगरी नै विवाद सिर्जना भएको थियो ।
यता, सरकारको आगामी वर्षको नीति तथा कार्यक्रमले पुँजी बजारलाई सम्बोधन गर्न सफल भएको लम्साल बताउँछन् । पुँजीबजारलाई गतिशील बजार भनिएकोमा खुसी व्यक्त गर्दै उनले भने – “नीति तथा कायक्रममा समबोधन गरिनुले बजेटमा पनि विस्तृत रुपमा सम्बोधन हुने विश्वास पलाएको हो ।”
तर, लम्सालले भने झैं सरकारले प्रस्तुत गरेको नीति तथा कार्यक्रममा सेयर लगानीकर्ता उत्साहित देखिएनन् । यसका साथै कम्युनिस्ट सरकारसँग स्वभाविक रुपमा लगानीकर्ता डराएको जानकारहरुको दावी छ ।
सोमबार सरकारको नीति तथा कार्यक्रम सार्वजनिक भएपनि सोमबार २ अंकले घटेको सेयर बजार मंगलबार ४.३१ अंकले घटेको हो । नेप्से घट्दा मंगलबार कारोबार रकम भने बढेको छ । यसदिन बजारमा १६० कम्पनीको १० लाख ५८ हजार कित्ता सेयर ५३ करोड ८३ लाख ७४ हजार १ सय ८४ रुपैयाँमा किनबेच भए ।
जसमध्ये नेपाल इन्भष्टमेन्ट बैंकको संस्थापक सेयरको मात्रै २२ करोड २५ लाख रुपैयाँको सेयर किनबेच भएका छन् । यही कारोबारले मंगलबारको कारोबार रकम बढाएको हो । 
मंगलबार सुर्योदय लघुवित्तका लगानीकर्ताले ९.९७ प्रतिशतले कमाउँदा सेन्ट्रल फाइनान्सको सेयर मूल्य सबैभन्दा धेरै ६.२५ प्रतिशतले ओरालो लागेको छ । यसदिन कारोबारमा आएका ९ मध्ये ६ समूहकोसमूहगत परिसूचकमा गिरावट आए भने ट्रेडिङ समूहको कुनै कारोबार भएन ।