एजेन्सी । स्पेनिस क्लब बार्सिलोनाका पुर्व मिडफिल्डर आन्द्रेस इनिएष्टाले जापानको शीर्ष डिभिजनको क्लबबाट व्यवसायिक लिग खेल्ने भएका छन् । इनिएष्टाले शीर्ष डिभिजनको जे लिग क्लब भिसेल कोवीबाट व्यवसायिक फुटबल खेल्न लागेका हुन् ।
बार्सिलोनाका लिजेण्ड इनिएष्टा भिसेल कोवीसँग सम्झौता गर्न जापान प्रस्थान गरेको अन्तर्राष्ट्रिय समाचार संस्थाहरुले जनाएका छन् । इनिएष्टाले अफिसियल सोसियल साइड पेज इन्स्टाग्राममा प्राइभेट जेट विमानमा बसेको तस्विर राख्दै नयाँ घर प्रस्थान गरेको लेखेका छन् ।
इनिएष्टाले राखेको तस्विरमा बार्सिलोनाको प्रायोजक राकुटेन कम्पनीका सीईओ हिरोशी मिकितानीसमेत रहेका छन् । राकुटेन कम्पनि भिसेल क्लबको मालिक समेत हो । इनिएष्टा र भिसेलले बिहिबार सम्झौता पत्रमा हस्ताक्षर गर्ने बताईएको छ ।
भिसेलमा आबद्द भए ३४ बर्षीय इनिएष्टाले आर्सनल तथा जर्मनीका पुर्व फरवार्ड लुकास पोडोलस्कीसँगै खेल्ने छन् । जे लिगको १५ खेल सकिदा यो सिजन भिसेल छैटौं स्थानमा रहेको छ । गत सिजन भिसेल नवौं स्थानमा रहेको थियो ।
विश्वकप बिजेता इनिएष्टाले बार्सिलोनालाई यो सिजन ला लिगा च्याम्पियन बनाएर क्लब छाडेका थिए । गत आइतबार रियल सोसिडाडविरुद्ध मैदान उत्रदै उनले बार्सिलोनाबाट अन्तिम खेल खेलेका थिए । बार्सिलोनाको युथ र सिनियर टोली गरी २२ बर्ष बिताएका इनिएष्टाले बार्सिलोनाबाट २२ मुख्य उपाधि जितेका छन् ।
इनिएष्टाले बार्सिलोनाको सिनियर टोलीमा भने १६ बर्ष बिताए । बार्सिलोनाबाट इनिएष्टाले ९ पटक ला लिगा, ४ पटक च्याम्पियन्स लिग, ६ पटक कोपा डेल रे र ३ पटक क्लब विश्वकपको उपाधि जितेका छन् । आगामी रुसमा हुने विश्वकपको लागि स्पेनिस टोलीमा रहेका इनिएष्टाले स्पेनबाट सन् २०१० मा विश्वकप जितेका थिए । उक्त विश्वकपको फाइनलमा इनिएष्टाले नै निर्णायक एक गोल गरेका थिए ।