देश

कहाँ छन् गोरेले नाम लिएका एसएसपी श्याम खत्री ? प्रहरी भन्छ– खोजिरहेका छौं

कहाँ छन् गोरेले नाम लिएका एसएसपी श्याम खत्री ? प्रहरी भन्छ– खोजिरहेका छौं

काठमाडौं । साढे ३३ किलो सुन गायब र सनम शाक्य हत्या प्रकरणमा फारार अभियुक्तमध्ये चर्चित नाम हो एसएसपी श्यामबहादुर खत्री । सुन गायब र सनम शाक्यको हत्या प्रकरणमा खत्रीको नाम जोडिएपछि उनी फरार छन् ।

मोरङ जिल्ला अदालतमा खत्रीसहित फरार अन्य अभियुक्त विरुद्ध संगठित अपराध ऐनअन्तर्गत मुद्दा दायर भएको छ । यो प्रकरणमा पक्राउ परेका ३० जनामध्ये २८ जना पूर्पक्षका लागि जेल चलानसमेत भइसकेका छन् । गृह मन्त्रालयका सह–सचिव ईश्वरराज पोडेल नेतृत्वको उच्चस्तरीय छानबिन समितिले सुन तस्करीमा एसएसपी खत्रीको समेत संग्लनता रहेको औंल्याएको थियो । सुन गायब र सनम हत्याका मुख्य अभियुक्त भनिएका चूडामणि उप्रेती ‘गोरे’ मंगलबार पक्राउ परेपछि अब पहिलो खोजीमा एसएसपी खत्री रहेको समितिका एक सदस्यले बताए । “गोरे नै पक्राउ परेको अवस्थामा हामी श्याम खत्रीको खोजी गम्भीरतापूर्वक गरिरहेका छौं,” ती सदस्यले भने । 

बुधबार मोरङ अदालतमा बयान दिने क्रममा गोरेले पनि सुन तस्करी र सनम हत्यालगायत सबै कुराको बारेमा एसएसपी श्याम खत्री र एमके अग्रवाललाई थाहा भएको बताएका छन् । प्रहरी प्रधान कार्यालयका प्रवक्ता एसएसपी शैलेश थापाका अनुसार एसएसपी खत्रीले गत चैत १३ गतेदेखि वैशाख ११ गतेसम्मको बिदा लिएका थिए । खत्री वैशाख १२ गते हाजिर हुनुपर्ने हो । बिदा लिएयता एसएसपी खत्री सम्पर्कविहीन भएका थिए ।

अनुसन्धान समितिले खत्रीका चालक विष्णुबहादुर खड्कालाई पक्राउ गरेको थियो । खड्का मोरङ जिल्ला अदालतबाट १५ हजार धरौटीमा छुटिसकेका छन् । एसएसपी थापाले खत्री अहिले स्वतः निलम्बन भइसकेको बताउँदै प्रहरी प्रधान कार्यालयले तोकिएको समयमा उपस्थित नभएपछि आफ्नो कानुनी प्रक्रिया सुरु भएको बताए । बिदा बसेको १५ दिनसम्म पनि कुनै पनि तहको प्रहरी सम्पर्कमा नआए ताकेता गर्ने, खोजी गर्ने र नभए निलम्बन तथा बर्खास्तसम्म हुने एसएसपी थापाले बताए । 

उच्च स्रोतका अनुसार एसएसपी खत्री नेपालबाहिर छन् । उनी पक्राउ परेमा प्रहरी उच्चतहका अधिकारीको पनि पोल खुल्नसक्ने बताइएको छ । खत्रीको खोजीका लागि प्रहरीको विशेष व्युरो र सिआइबीको टोली खटिएको छ । 

प्रहरी प्रधान कार्यालयको मानव स्रोत विभागमा कार्यरत खत्रीलाई छानबिन समितिले बयानका लागि बोलाएको थियो । सुन गायब र सनम शाक्य हत्याकाण्डमा समेत उनको संलग्नता जोडिएको पाइएपछि समितिले खत्रीलाई उपस्थित गराउन प्रहरी प्रधान कार्यालयलाई निर्देशन दिएको थियो । खत्रीको खोजीका लागि देशभरका प्रहरी कार्यालयमा सर्कुलरसमेत जारी भएको छ । गोरे र एसएसपी खत्रीको सम्पर्क रहेको समितिको अनुसन्धानमा खुलेको थियो  । खत्री यसअघि २०७३ पुष २१ गते केन्द्रीय अनुसन्धान ब्युरो (सिआइबी)ले बरामद गरेको सुनमा पनि मुछिएका थिए ।

उनको संग्लनता देखिएको भन्दै सिआइबीको टोलीले उनलाई पक्राउसमेत गरेको थियो । पछि उनको निलम्बन फुकुवा भएको थियो । त्यतिबेला पनि नेपाल आएको साढे ३३ किलो सुन गोरेकै भएको अनुसन्धानबाट खुलेको भए पनि उनको वास्तविक नाम र ठेगाना पत्ता लगाउन नसक्दा उनलाई फरार अभियुक्त तोकिएको थिएन । 

तपाईंको मत