बीबीसी । उत्तर कोरियाकी वरिष्ठ अधिकारी छोए सन्ह्वीले अमेरिकी उपराष्ट्रपति माइक पेन्सलाई ‘मूर्ख’ भन्दै उनले मंगलबार दिएको बयानको कडा आलोचना गरेकी छन् । पछिल्ला केही दिनहरुमा उत्तर कोरियाले दिइरहेको यस प्रकारको प्रतिक्रियापछि दुईदेशबीच तय भएको बैठक संकटमा परिरहेको बताइएको छ । ट्रम्पले पनि यसअघि जुन १२ मा निश्चित गरिएको बैठक स्थगित हुने वा रद्द समेत गर्न सकिने संकेत दिएका थिए ।
वास्तवमा गत साता राष्ट्रिय सुरक्षा सल्लाहकार जोन बोल्टनले उत्तर कोरियालाई लिबियासँग तुलना गरेपछि किम आफैँले आक्रामक प्रतिक्रिया दिँदै बैठकमा सहभागी नहुने धम्की दिएका थिए । उत्तर कोरियाले लिबियाका अगाडि आफ्ना हतियार अतुलनीय रहेको विश्वास गर्ने हुनाले नै यस विषयलाई अत्यन्तै संवेदनशील मान्ने गरेको छ । तर बारम्बार चेतावनी दिइरहँदा पनि मंगलबार उपराष्ट्रपति पेन्सले फेरि बोल्टनकै भनाइ दोहोर्याएर उत्तर कोरिया लिबियाको अवस्थामा पुग्न सक्ने बताएका हुन् जसलाई अहिले उत्तर कोरियाले ठूलो अपमानका रुपमा लिएको छ ।
यसै विषयमा पेन्सलाई प्रतिउत्तर दिँदै लामो समयदेखि अमेरिकासँगको कूटनीतिक छलफलमा आबद्ध वरिष्ठ राजनीतिज्ञ सनह्वीले भनिन्, ‘पछिल्ला केही दिनदेखि पेन्सले मिडियामा लापरबाहीपूर्वक बयान दिइरहेका छन् । अमेरिकी राजनीतिमा संलग्न उपराष्ट्रपति जस्ता व्यक्तिको मुखबाट मैले त्यस्तो अनभिज्ञ र मूर्खतापूर्ण टिप्पणी सुन्नु पर्दा अहिले म धेरै आश्चर्यमा परेकी छु ।’ यति मात्र नभएर उनले पेन्सलाई ‘पोलिटिकल डमी’ अर्थात् ‘कृतिम राजनीतिज्ञ’ को नाम समेत दिएकी छन् । उनको सो बयानबारे उत्तर कोरियाको आधिकारिक संचार केसिएनएले उल्लेख गरेको हो ।
त्यसकारण आफूहरुले अमेरिकासँग वार्ताका लागि कुनै भिख नमाग्ने हुँदा अमेरिकाले उत्तर कोरियाको सामना बैठकबाट गर्ने वा हतियारमार्फत गर्ने भन्ने पनि अमेरिकाकै हातमा रहेको उनले बताएकी हुन् । उता राष्ट्रपति ट्रम्पले भने आफ्नो अडान नछाड्ने बताउँदै बैठकको तयारी अघि बढाउन पहिले उत्तर कोरियाले अमेरिकाको माग पूरा गर्नुपर्ने बताइरहेका छन् ।