एजेन्सी । इन्ग्लिश क्लब टोटनह्यामका प्रशिक्षक मौरिचियो पोचेटिनो सन् २०२३ सम्म टोटनह्याममै रहने भएका छन् । प्रशिक्षक पोचेटिनोले बिहिबार क्लबसँग पाँचबर्षे नयाँ सम्झौता गरेका छन् ।
प्रशिक्षक पोचेटिनोले बार्षिक ८.५ मिलियन पाउण्ड पाउनेगरी टोटनह्यामसँग नयाँ सम्झौता गरेको अन्तर्रा्ष्ट्रिय समचार संस्था गार्जियनले लेखेको छ । ४६ बर्षीय प्रशिक्षक पोचेटिनो सन् २०१४ मा टोटनह्याम आएका थिए ।
टोटनह्यामसँग पाँच बर्षे सम्झौता गरेपछि बोल्दै प्रशिक्षक पोचेटिनोले नयाँ सम्झौताले आफुलाई सम्मानित महसुस भएको र क्लबको लागि केहि गर्ने बताए । प्रशिक्षक पोचेटिनोले भने, “क्लबसँग दिर्घकालिन सम्झौता गरेको छु । यो एक बिशेष क्लब हो, क्लबको सफलताको लागि मैदान बाहिर र भित्र रचनात्मक कार्य गर्ने छु ।“
साउथह्याम्पटनका प्रशिक्षक रहिसकेका अर्जेन्टाईन प्रशिक्षक पोचेटिनो प्रिमियर लिगमा २०० खेल पुरा गरीसकेका छन् । प्रशिक्षक पोचेटिनोले यो सिजनको प्रिमियर लिगमा टोटनह्यामलाई तेस्रो स्थानमा राख्न सफल भएका थिए ।