-(2).jpeg)
काठमाडौं । संस्कृति, पर्यटन तथा नागरिक उड्ययनमन्त्री रवीन्द्र अधिकारीले कर्मचारीतन्त्रमा रहेको ढिलासुस्ती प्रवृत्तिको चर्को आलोचना गरेका छन् । सय दिने कार्ययोजनाको प्रगति विवरण सार्वजनिक गर्दै उनले कर्मचारीतन्त्रमा उपलब्ध स्रोतसाधानको अधिकतम उपयोग गर्ने क्षमता नरहेको बताए ।
“हामीसँग सीमित स्रोत तथा साधन छ, त्यसको पनि उपोग गर्ने क्षमता छैन । अधिकतम उपयोगको त कुरै छाडौं,” मन्त्री अधिकारीले भने, “व्यवस्थापिका (तत्कालीन) संसद्मा रहँदा संसदीय कर्मचारीमात्रै यस्तो हो, चाह्यो भने कार्यपालिकाको कर्मचारीले काम गर्नसक्छ भन्ने लाग्थ्यो । तर हैन रहेछ । खासै फरक देखिन मैले, उस्तै–उस्तै रहेछ ।”
आफूले सय दिनभित्र गर्न सकिने कार्ययोजना सार्वजनिक गरेपछि त्यसको कार्यान्वयनका लागि निकै संघर्ष गर्नुपरेको उनको अनुभव छ । “सुरुका १५ दिन त मलाई काम हुुँदैछ–हुँदैछ भने खेलाँची गर्नुभयो । १५ दिनसम्म पनि पछि लागेको लागै गरेपछि भने अब छाड्ने रैनछ भनेर बल्ल गर्न थाल्नुभयो,” टेबुल ठोकेर मन्त्री अधिकारीले भने, “भयो भयो भनिराख्नु हुन्छ तर काम हुँदैन । कसरी हुँदैन ? तपाईंहरुलाई थाहा छैन काम गर्नुपर्छ भन्ने ?” सय दिने कार्ययोजनामा ९५ प्रतिशत काम भएको उनले दाबी गरे । सुरुदेखि नै कर्मचारीले निर्देशन दिएअनुसार काम गरेको भए ९८ प्रतिशत काम हुने उनको भनाइ छ ।
अब चौमासिक कामको चौमासिक समीक्षा गर्ने उनले बताए । वार्षिक समीक्षा गर्दा अन्तिममा आएर काम गर्न सकिन भनेर जिम्मेवारीबाट उम्किने प्रवृत्ति रहेको प्रसंग कोट्याउँदै उनले भने, “सरुवा भयो भने त झनै सजिलो ।” मन्त्री अधिकारीले यसो भन्दा छेउमै थिए विभागीय मन्त्रालयका सचिव कृष्णप्रसाद देवकोटा ।
राष्ट्रिय योजना आयोगका सदस्य इन्जिनियर सुशील भट्टलाई छेउमै रोखर मन्त्री अधिकारीले भने, “योजनाहरु वस्तुनिष्ठ छैनन् । योजना आयोगका सदस्यज्यू यहीँ हुनुहुन्छ । कार्ययोजना क्षमता छैन, प्राविधिक योजनाहरु वस्तुनिष्ट छैनन्, नीतिगत अवस्था त्यस्तै छ । कानुन र कार्यविधि पनि झन्झटिला छन् ।”
मन्त्री अधिकारीले शुक्रबार मन्त्रालयमा पत्रकारहरुलाई बोलाएर सय दिने कार्ययोजनाको १४ बुँदे कार्यान्वयन प्रगति विवरण सार्वजनिक गरेका हुन् । विवरणमा त्रिभुवन अन्तर्राष्ट्रिय विमानस्थल २१ घण्टा सञ्चालन सुरु गरिएकोदेखि बिरुवा रोपिएकोसम्मका प्रसंग उल्लेख गरिएको छ । त्रिभुवन अन्तर्राष्ट्रिय विमानस्थलमा नेपालको कला, संस्कृति र पर्यटकीय सम्पदा झल्किने ५ वटा ठूला इलेक्ट्रोनिक एलईडी एचडी डिस्प्ले बोर्ड राख्नेलगायतका काम भने पाइपलाइनमा राखेर काम भैरहेको मन्त्रीले उल्लेख गरेका छन् ।
कर्णाली पर्यटन वर्ष २०७५ को रारा तालबाट प्रधानमन्त्री केपी शर्मा ओलीले उद्घाटन गरेको र भारतीय प्रधानमन्त्री नरेन्द्र मोदीले नेपालका धार्मिकस्थल भ्रमणले विश्वभरका उनीसँग सम्बन्धित सामाजिक सञ्जालका प्रयोगकर्तामा पहुँच पुगी पर्यटन प्रवद्र्धनमा सहयोग पुगेकोलाई पनि प्रगति विवरणमा उल्लेख गरिएको छ ।
रानीपोखरी र काष्ठमण्डप पुनःनिर्माण सुरु भएको, धरहरा पुनःनिर्माण कार्य अगाडि बढेको, एनएसीलाई नयाँ ६ वटा ट्वीनअटर विमान खरिद गर्न व्यापारिक योजनासहितको प्रतिवेदन अन्तिम चरणमा पुगेकोलगायतका प्रगति विवरण समेटिएको ७ पृष्ठ लामो प्रतिवेदन मन्त्री अधिकारीले सार्वजनिक गरेका छन् । यसैबीचमा सप्तरीको राजविराज र अछामको साँफेबगर विमानस्थल पुनः सञ्चालनमा आएको उनले बताए ।
