विराटनगर । साढे ३३ किलो सुन तस्करी प्रकरण र सनम शाक्य हत्याको मुख्य अभियुक्त चूडामणि उप्रेती (गोरे)को बयान ३ दिनमा पनि सकिएको छैन । बुधबार, बिहीबार र शुक्रबार गरेर जिल्ला अदालत मोरङमा २७ पेजको बयान दिएको उनका कानुन व्यवसायी यमबहादुर मगरले बताए । बुधबार ५ पेज, बिहीबार ११ पेज र शुक्रबार ११ पेजको बयान लिइउको छ ।
कानुन व्यवसायी मगरका अनुसार बयान घटनाक्रमको अन्तिम अवस्थामा आइपुगेको छ । अब यातना दिएको भिडियोमा देखिएका मानिसहरु (भिडियो देखाउँदै) को बारेमा सोधिने उनले बताए । गोरेले गरेको भनिएको सुन तस्करीको सुरुवात, तस्करीमा संलग्न व्यक्तिहरु, सनम शाक्य हत्या र हत्यामा संलग्न भनिएका अभियुक्तहरुको विषयमा गोरेले बताइसकेका छन् ।
१५३ पेजको अभियोगपत्रमा उल्लेख भएका अभियुक्तहरुको विषय र घटनाक्रमको विषयमा एक–एक गरेर गोरेसँग बयान लिइएको छ । बयान आइतबार दिउँसोसम्ममा सकिने कानुन व्यवसायी मगरले बताए । जिल्ला अदालत मोरङका न्यायधिश नारायण शर्माको एकल इजलासमा मुख्य अभियुक्त गोरेको बयान भइरहेको छ । बयान सकिएपछि गोरेको विषयमा थुनछेक बहस सुरु हुनेछ ।