काठमाडौं । प्रमुख प्रतिपक्षी नेपाली कांग्रेसका शुभेच्छुक संगठनहरुको छाता संगठन नेपाल ट्रेड युनियन कांग्रेसको काठमाडौंमा जारी छैठौं राष्ट्रिय महाधिवेशनमा नयाँ नेतृत्व चयनका लागि शुक्रबार निर्वाचन हुन गइरहेको छ ।
जेठ २९ गतेबाट शुरु भएको राष्ट्रिय महाधिवेशनको निर्वाचनमा संस्थापन पक्ष र पौडेल पक्ष प्यानलसहित प्रतिष्पर्धामा उत्रिएका छन् । संस्थापन पक्षबाट निवर्तमान अध्यक्ष खिलानाथ दाहाल र पौडेल पक्षबाट पुस्करराज आचार्य प्यानलसहित चुनावी मैदानमा उत्रिएका हुन् ।
आगामी चार वर्षका लागि ४५ सदस्यीय नयाँ कार्यसमिति चयन गर्नका लागि शुक्रबार दिउँसो १ वजेबाट मतदान शुरु गरिने निर्वाचन अधिकृत धर्म खनालले जानकारी दिएका छन् । उनका अनुसार देशैभरीका ७२ जिल्लाबाट आएका १४ सय २० जना प्रतिनिधिहरुले मतदानमा सहभागिता जनाउने छन् ।
ट्रेड युनियन कांग्रेसमा कांग्रेसका २५ शुभेच्छुक संगठनहरुको आवद्धता रहेको ट्रेड युनियन कांग्रेसका नुवाकोट अध्यक्ष शिव देवकोटाले जानकारी दिएका छन् ।
