एजेन्सी । रसियामा जारी विश्वकप फुटबल अन्तर्गत समूह डि मा रहेको अर्जेन्टिनाले आइसल्याण्डसँग १–१ गोलको बराबरी खेलेको छ । तर, गोल मेसिन भनेर चिनिने विश्वचर्चित खेलाडी तथा अर्जेन्टिनाका कप्तान लियोनल मेस्सीको जादु भने चलेन ।

कप्तान लियोनल मेस्सीले सुरुवाती समयमा केही आक्रामक खेल खेल्ने प्रयास गरेपनि विपक्षी टिमका खेलाडीले बिफल पारिदिए । पहिलो हाफको मध्यम समयमा मेस्सीले प्रहार गरेको बल आइसल्याण्डका गोलकिपरले रोकिदिएका थिए ।

सटिक पास निकालेपनि मेस्सीले पहिलो हाफमा आक्रामक खेल खेलेनन् । मेस्सीले खेल अवधिभर १० वटा सर्ट प्रहार गरेका थिए तर उनको एउटा बल पनि गोल हुन सकेन । खेलको ८० औं मिनेटमा मेस्सीले प्रहार गरेको बल साइडबारको नजिकैबाट बाहिरिएको थियो । एकपछि अर्को सर्ट प्रहार गरेपनि मेस्सी सफल हुन भने सकेनन् ।

यसैबीच कप्तान मेस्सी पेनाल्टीमा पनि चुकेका छन् ।  आइसल्याण्डका खेलाडीले डिबक्सभित्र फल गरेपछि अर्जेन्टिनाले पेनाल्टी पाएको थियो  खेलको ६४ औं मिनेटमा पेनाल्टी हान्ने क्रममा मेस्सी फेरि एकपटक चुकेका हुन् ।

यसअघि सन् २०१६ मा कोपा अमेरिका कप फुटबलको फाइनलमा चिली विरुद्ध पेनाल्टी सुटआउटमा अर्जेन्टिना पराजित हुँदा मेस्सीले पेनाल्टी मिस गरेका थिए । फाइनलमा चिलीसँग हार्नु र पेनाल्टीमा चुक्दा कप्तान मेस्सीले अन्तर्राष्ट्रिय फुटबल करिअरबाट सन्यासको घोषणा गरेका थिए । तर अर्जेन्टिनाका राष्ट्रपतिदेखि सबैको दबाबमा मेस्सीले सन्यास फिर्ता लिएका थिए ।

मेस्सीलाई विश्वकप फुटबलको उपाधि दिलाउने यो अन्तिम मौका हो । यसअघि सन् २०१४ को विश्वकपमा मेस्सी आफ्नो देशलाई विश्वकप फुटबलको उपाधि दिलाउन असफल रहेका थिए । सन् २०१४ को विश्वकपमा अर्जेन्टिना जर्मनीसँग १–० गोलअन्तरले पराजित हुँदै उपविजेता बनेको थियो ।