बीबीसी । उत्तर कोरियाली नेता किम जोङ उन यो वर्ष मात्र तेस्रो पटक चीन भ्रमणमा गर्दैछन् । अमेरिकी राष्ट्रपति डोनाल्ड ट्रम्पसँगको ऐतिहासिक भेटवार्ताको एक हप्तापछि नै उनले दुई दिनका लागि चीनको यात्रा गर्ने भएका हुन् । 

यस क्रममा किमले राष्ट्रपति शि जिङपिङसँग भेट गरि उत्तर कोरियामाथि जारी प्रतिबन्ध र कोरियाली प्रायद्विपको निशस्त्रीकरणबारे छलफल गर्ने बताइएको छ । उनले ट्रम्पसँगको बैठकमा पनि यिनै विषयमा वार्ता गरेका थिए । उत्तर कोरियाको सबैभन्दा पुरानो आर्थिक साझेदार भएको नाताले यसअघि नै चीनले पनि उनीहरुमाथिको प्रतिबन्धलाई केही खुकुलो पार्न अमेरिका र संयुक्त राष्ट्र संघसमक्ष आग्रह गरिसकेको छ । सत्तामा आइसकेपछि किमको पहिलो विदेश भ्रमण पनि चीन नै रहेको थियो । 

उता दक्षिण कोरिया र अमेरिकाले पनि उत्तर कोरियाको माग पूरा गर्दै मंगलबार संयुक्त सैन्य अभ्यास रद्द गर्ने घोषणा गरेका हुन् । चीन र उत्तर कोरियाले लामो समयदेखि नै यसप्रति आपत्ति जनाउँदै आएका थिए । तर अहिले सैन्य कार्यक्रम रद्द गराइएपनि दक्षिणमा रहेका २९ हजार अमेरिकी सेना अहिले नै आफ्नो देश भने फर्किने छैनन् । उत्तर कोरियाले शान्तिपूर्ण व्यवहार जारी राखेसम्म अमेरिकाले पनि दक्षिण कोरियासँगको सैन्य अभ्यासमा रोक लगाइरहने यसअघि ह्वाइट हाउसकी  प्रवक्ता सेरा स्यान्डर्सले जानकारी दिएकी हुन् ।