एजेन्सी । ब्राजिलका स्टार खेलाडी नेयमारले ओपनिङ गेममा स्विट्जरल्यान्डविरुद्ध १–१ को बराबरीपछि सोमबारको ट्रेनिङमा भाग नलिएको बताइएको छ । पहिले पनि बायाँ खुट्टाको शल्यक्रिया गराइसकेका नेयमारमाथि शनिबारको खेलमा स्विट्जरल्यान्डका खेलाडीले १० पटकसम्म ‘फल’ गरेपछि उनको खुट्टामा फेरि चोट लागेको बताइएको हो ।
त्यसैकारण उनले सोमबार ट्रेनिङ गर्नुको साटो चिकित्सककहाँ थेरापी गराएका हुन् । उनी आफैँले समेत इन्स्टाग्राममा चोट लागेको खुट्टाको तस्बिर राखेर ‘कडा मिहिनेत गर्नुपर्छ’ भन्ने लेखेका छन् ।
२६ वर्षीय विश्वका सर्वाधिक महङ्गा खेलाडी नेयमारविरुद्ध सन् १९९८ को विश्वकपपछि सबैभन्दा धेरै ‘फल’ भएको हो ।
फेब्रुअरीपछि शनिबार आफ्नो पहिलो प्रतिस्पर्धात्मक खेलमा सहभागी भएका नेमारले यसअघि पनि खुट्टामा समस्या भएकै कारण पिएसजीको अन्तिम गेममा सहभागी हुन पाएका थिएनन् ।
यस विषयमा उनले संचारकर्मीहरुसँग भने, ‘मैले गर्ने भनेको फुटबल खेल्ने मात्र हो । बाँकी खेल त रेफ्रीले नै हेर्नुपर्छ । तरपनि फउल हुनु स्वभाविक हो र मलाई थाहा छ आगामी खेलमा पनि यस्तै हुनेछ । फुटबलमा यो सामान्य कुरा हो । तरपनि यसप्रति ध्यान दिनुपर्छ ।’