एजेन्सी । रसियामा जारी विश्वकप फुटबलअन्तर्गत समूह ‘बि’ को खेलमा पोर्चुगलले जित हात पारेको छ । पोर्चुगलले मोरक्कोलाई १–० गोलले पराजित गरेको हो । खेलको चौथो मिनेटमा नै पोर्चुगलका कप्तान क्रिस्टियानो रोनाल्डोले गोल गर्दै अग्रता दिलाएका थिए । उनले कर्नरबाट आएको बललाई हेडर गोल गरेका थिए ।
सुरुवाती समयमा नै अग्रता बनाएको पोर्चुगलले त्यसपछिको समयमा भने राम्रो प्रदर्शन गर्न सकेन । १–० गोलको अग्रता बनाएपनि पोर्चुगल पहिलो हाफसम्म दबाबमा खेलेको थियो । मोरक्कोले गोल गर्ने केही राम्रो अवसर पाएपनि सदुपयोग गर्न सकेन । पहिलो हाफको अन्तिम समयतिर रोनाल्डोले दिएको बल गोन्कालो गुइडेसले गोल गर्ने अवसर पाएपनि गोल गर्न भने सकेनन् । उनले प्रहार गरेको बल मोरक्कोका गोलरक्षकले उत्कृष्ट बचाउ गरेका थिए ।
दोस्रो हाफमा पनि मोरक्कोले बल नियन्त्रणमा लिएको थियो । पटक–पटक प्रयास गर्दा पनि मोरक्कोले गोल गर्न भने सकेन । खेलको ५६ औं मिनेटमा मोरक्कोले उत्कृष्ट २ सर्ट प्रहार गरेका थिए । तर पोर्चुगलका गोलकिपरले उत्कृष्ट बचाउ गरेपछि मोरक्कोले बराबरी गोल असफल बनेको थियो ।
जितसँगै पोर्चुगलले महत्वपूर्ण ३ अंक बटुलेको छ । पोर्चुगलको २ खेलबाट एक खेलमा बराबरी र एक खेलमा जितसहित ४ अंक भएको छ । पराजित मोरक्को भने समूह चरणबाटै बाहिरिने पक्का जस्तै भएको छ ।
