काठमाडौं । सरकार लोकतन्त्रका मूल्य–मान्यता विपरित चलिरहेको निष्कर्षसहित संसद र सडकमा आन्दोलनरत प्रमुख प्रतिपक्षी नेपाली कांग्रेस झनै आक्रामक ढंगबाट अघि बढ्ने भएको छ । सभापति शेरबहादुर देउवाको बुढानिलकण्ठस्थित निवासमा बुधबार बसेको कांग्रेस शीर्ष नेताहरुको बेठकले सरकार विरुद्ध झनै आक्रामक ढंगले प्रस्तुत हुने निर्णय गरेको छ ।
शीर्ष नेताहरूको बैठकले सरकार संविधान विपरीत अघि बढेको निष्कर्ष निकाल्दै संघीय संसदसँगै ७ वटै प्रदेशमा संसद अवरुद्ध गर्ने निर्णय गरेको बैठकमा सहभागी नेताहरुले जानकारी दिएका छन् । बैठकमा डा. गोविन्द केसीको मागप्रति सरकार गम्भीर नभएको भन्दै कांग्रेसले सडक तथा सदनबाट आन्दोलनलाई थप चर्काउने निर्णय गरेको बैठकमा सहभागी नेता अर्जुननरसिंह केसीले जानकारी दिए ।
‘‘डा. केसीको माग पूरा गर्न मन्त्रीस्तरकै वार्ता टोली गठन गर्नुपर्छ भन्ने हाम्रो माग हो । यसका लागि हामीले सरकारलाई दबाव दिने निर्णय गरेका छौं,’’ उनले भने । उनका अनुसार एउटै पार्टीको सभामुख र उपसभामुख बनाएर सरकारले संविधान मिचेको दाबी गर्दै प्रतिपक्षी कांग्रेसले यसका विरुद्धमा पनि विरोध गर्ने निर्णय छ
कांग्रेसका शीर्ष नेताहरुको बैठकमा पार्टीको विधान परिमार्जनका लागि विधान मस्यौदा परिमार्जन समिति गठन गर्नेपनि सहमति जुटेको छ । विधान मस्यौदा परिमार्जन समिति गठनका लागि वरिष्ठ नेता रामचन्द्र पौडेलले सभापति देउवालाई छिट्टै नामावली बुझाउने भएका छन् ।
नौ सदस्यीय हुने भनिएको विधान मस्यौदा परिमार्जन समितिमा संयोजकसहित ५ सदस्य आफूसँग राखेर देउवाले पौडेल पक्षलाई चार जनाको नाम दिन भनेका छन् । सभापति देउवाले साउनको पहिलो साताभित्रै समिति गठन गर्ने तयारी गरेको बताइएको छ । उनी साउन ६ गते स्वास्थ्य उपचारका लागि विदेश जाँदैछन् । बैठकमा भ्रातृ संगठन नेविसंघमा देखिएको विवाद समाधानका लागि पनि पहल गर्ने सहमति भएको छ ।