काठमाडौं । नेपाल स्टक एक्सचेन्ज (नेप्से) बाट सरकारद्वारा हटाइएका प्रमुख कार्यकारी अधिकृत (सीईओ) चन्द्रसिंह साउदलाई सर्वोच्च अदालतले तत्कालका लागि काममा फर्किनू भनेर आदेश दिए पनि उनलाई काम गर्न रोक लगाइएको छ । सर्वोच्चको आदेशअनुसार उनी मंगलबार नै नेप्सेमा पुगेर हाजिर गरी फर्केका थिए । बुधबार पनि उनी कार्यालय पुगेका थिए तर उनले आज भने हाजिर गर्न नै पाएनन् ।
सरकारले गत आइतबार साउदलाई बर्खास्तिको पत्र थमाएको थियो । तर, सरकारको निर्णयविरुद्ध सर्वोच्चत पुगेका साउदलाई सर्वोच्चले तत्कालका लागि काममा फर्किनू भन्ने आदेश दिएको थियो ।
मन्त्रिपरिषद्ले साउदलाई हटाएपछि अर्थ मन्त्रालयले मन्त्रीस्तरीय निर्णयबमोजिम अर्को व्यवस्था नभएसम्मका लागि उपसचिव रमेश अर्याललाई नेप्सेको सीईओमा नियुक्त गरेको थियो । त्यसपछि अर्यालले कार्यभार सम्हालेका हुन् ।
कारोबार प्रभावित– १७ करोडको कारोबार, नेप्से १२ सयको बिन्दु तल
बुधबार नेप्सेमा सीईओ पुनर्वहाली भएका गतिविधिका कारण सेयर बजार पनि प्रभावित रह्यो । यसदिन सिस्टम खुल्ने र बन्द हुने क्रमले निरन्तरता पाउँदा दिनभरमा करिब २ घण्टा नेप्सेको साइटमा समस्या देखिएको थियो ।
यसदिन नेप्सेको लफडा र साइट समस्याका कारण बजारको कारोबार उल्लेख्य हुन सकेन । यसदिन बजारमा कूल १७ करोड ५३ लाख ७७ हजार रुपैयाँको कारोबार हुँदा नेप्से परिसूचक ५.७ अंकले ओराला लागेको हो । कारोबार सुरु भएदेखि नै घट्ने क्रममा रहेको परिसूचक अन्तिम १० मिनेट केही सुधारिने प्रयास गर्नुबाहेक दिनैभरि घटिरह्यो ।
साताको चौथो दिन तथा नयाँ आर्थिक वर्षको दोस्रो दिन पनि घट्ने क्रममा नेप्से परिसूचक १२ सय अंकभन्दा तल झर्यो । १२ सय ४ दशमलव ३१ अंकबाट सुरु भएको नेप्से परिसूचक ११ सय ९८ दशमलव ६१ अंकमा पुगेर रोकिएको हो ।
नेप्से घट्दा यसदिन “क” वर्गका कम्पनीहरुको कारोबार मापन गर्ने सेन्सिटिभ इन्डेक्स पनि १.२४ अंकले घटेर २५२.३८ अंकमा आइपुगेको छ ।
१७ लाख ५३ हजार रुपैयाँको कारोबार हुने क्रममा यसदिन बजारमा मात्र १३९ कम्पनीका ४ लाख ७७ हजार रुपैयाँको सेयर किनबेच भए । कारोबार रकम अघिल्लो दिनभन्दा ३ करोड रुपैयाँ कम हो ।
नेप्से घट्दा बुधबार कारोबारमा आएका ११ समूहमध्ये ९ वटामा गिरावट आएको छ । यसदिन वित्त समूह ०.७६ अंकले बढ्नु र होटल समूह स्थिर रहनुको बाबजुद सबै समूह घटे । घट्नेमा निर्जीवन बीमा समूह सर्वाधिक ६१.६१ अंकले घट्यो । प्रतिशतको हिसाबले ट्रटडिङ समूह सर्वाधिक १.४ प्रतिशत (२.७९ अंक)ले ओरालो लाग्यो ।
बीमा समूह मंगलबार जीवन बीमा र निर्जीवन बीमा समूहमा विभाजन गरिएको थियो ।
यसदिन कारोबारमा आउने १३९ कम्पनीमध्ये नबिल बैंकको मात्रै सर्वाधिक २ करोड ५७ लाख रुपैयाँ र नेपाल लाइफ इन्स्योरेन्स कम्पनीको १ करोड ३१ लाख रुपैयाँ बराबरको सेयर किनबेच भए ।
बुधबार सर्वाधिक कमाउनेमा नेसनल हाइड्रोपावरका लगानीकर्ता रहे । कम्पनीका लगानीकर्ताले ४.७१ प्रतिशत कमाउँदा नयाँ नेपाल लघुवित्तका सेयर मूल्यमा सर्वाधिक ६.६६ प्रतिशत को गिरावट आयो ।