एजेन्सी । जुलाईमा रसियामा सम्पन्न विश्वकप फुटबलको उपाधि फ्रान्सले जित्दा विश्वकपमा केही उत्कृष्ट गोलहरु भए । फिफाले भोटिङको आधारमा सार्वजनिक गरेको उत्कृष्ट १० गोलहरू यसप्रकार रहेका छन् ।

१. बेन्जामिन पाभार्ड, फ्रान्स

विश्वकप फुटबल २०१८ को सर्वोत्कृष्ट गोल गर्ने खेलाडी फ्रान्सका बेन्जामिन पाभार्ड घोषित भएका छन् । उनले प्रिक्वाटरफाइनलमा अर्जेन्टिनाविरुद्ध खेलको ५७ औं मिनेटमा गोल गरेका थिए । डिबक्सबाहिरबाट उनले राइट फुटेट सर्ट प्रहार गर्दै गोलमा परिणत गरेका थिए । उनको गोलको मद्दतमा फ्रान्सले अर्जेन्टिनालाई ४–३ गोलअन्तरले पराजित गरेको थियो । बेन्जामिनले फ्रान्सलाई २० वर्षपछि उपाधि दिलाउन महत्वपूर्ण भूमिका निभाएका थिए ।

२.जुयान क्युन्टेरो, कोलम्बिया

फिफाले सार्वजनिक गरेको उत्कृष्ट टप टेन गोलको दोस्रो स्थानमा कोलम्बियाका खेलाडी जुयान क्युन्टेरोले गरेको गोल छ । उनले जापानविरुद्ध खेलको ३९औं मिनेटमा गोल गरेका थिए । डिबक्सएरियाको दाहिने साइडको बाहिरबाट फ्रिकिक कोलम्बियाले पाएको थियो । फ्रिकिक प्रहार गर्न कोलम्बियाका मिड्फिल्डर जुयान क्युन्टेरो आए । लेफ्ट फुटेट सट प्रहार गरेका जुयानले फ्रिकिकलाई गोलमा परिणत गर्दै १–१ गोलको अग्रता दिलाएका थिए । यद्यपी जापानसँग कोलम्बिया २–१ गोलअन्तरले पराजित हुन पुगेको थियो ।

३. लुका मोड्रिच, क्रोएसिया

रसिया विश्वकपमा उत्कृष्ट गोल गर्ने खेलाडीको सूचीमा क्रोएसियाका कप्तान लुका मोड्रिच तेस्रो स्थानमा छन् । उनले अर्जेन्टिनाविरुद्धको समूह चरणको खेलमा शानदार गोल गरेका थिए । खेलको ८०औं मिनेटमा कप्तान मोड्रिचले करिब २५ याड टाढाबाट राइट फुटेट सट प्रहार गर्दै गोल गरेका थिए । अर्जेन्टिनाका ४ जना डिफेन्डरलाई छक्याएर उनले गोल गर्न सफल भएका थिए ।

यो खेलमा अर्जेन्टिनामाथि क्रोएसियाले ३–० गोलको जित हात पारेको थियो । ऐतिहासिक छलाङ मार्दै फाइनलसम्म पुगेको क्रोएसियाले विश्वकपको उपाधि जित्न भने असफल भयो ।

४. क्रिष्टियानो रोनाल्डो, पोर्चुगल

रसिया विश्वकपको उत्कृष्ट १० गोलमा पोर्चुगलका कप्तान क्रिष्टियानो रोनाल्डोको गोल चौथो नम्बरमा परेकोे छ । रोनाल्डोले समूह चरणको पहिलो खेलमा स्पेनविरुद्ध उत्कृष्ट गोल गरेका थिए । उनले यो खेलमा उत्कृष्ट गोल मात्रै गरेनन् ह्याट्रिक गोल पनि गरे । खेलको ८८औं मिनेटमा पोर्चुगलले डिबक्सभन्दा केही बाहिर फ्रिकिक पायो । फ्रि किक प्रहार गर्न कप्तान रोनाल्डो आफैँ आए । रोनाल्डोले फ्रि किकबाट उत्कृष्ट गोल गर्दै पोर्चुगललाई हारबाट जोगाएभने उनले ह्याट्रिक गोल पनि पूरा गरेका थिए ।

यो खेलमा पोर्चुगल र स्पेनले ३–३ गोलको बराबरी खेलेका थिए ।

५. लियोनल मेस्सी, अर्जेन्टिना

विश्व चर्चित खेलाडी तथा अर्जेन्टिनाका कप्तान लियोनल मेस्सी रसिया विश्वकपमा असफल बनेपनि उनले एक गोल उत्कृष्ट गरे । जुन गोल रसिया विश्वकपको उत्कृष्ट पाचौँ नम्बरमा छ । उनले समूह चरणको अन्तिम खेलमा नाइजेरियाविरुद्ध खेलको १४औं मिनेटमा गोल गरेका थिए । मैदानको विच भागदेखि पास दिएको बललाई मेस्सीले वान टचमा खेलाउदै अघि बढाएर राइट फुटेट सट प्रहार गर्दै गोल गर्न सफल भए ।

अर्जेन्टिनाले नाइजेरियालाई २–१ गोलअन्तरले पराजित गर्दै विश्वकपको प्रिक्वाटरफाइनलमा पुगेको थियो । तर प्रिक्वाटरफाइनलमा फ्रान्ससँग पराजित हुदै अर्जेन्टिना बाहिरिएको थियो ।

६. डेनिस चेरिशेभ, रसिया

रसियाका खेलाडी डेनिस चेरिशेभले क्रोएसियाविरुद्ध गरेको गोल उत्कृष्ट ६ नम्बरमा रहेको छ । उनले खेलको ३१औं मिनेटमा गोल गरेका थिए । उनले चार जना खेलाडीलाई छलेर प्रहार गरेको बल क्रोएसियाका गोलरक्षकले ठम्याउन सकेनन् । उनले गोल गर्दै आयोजक रसियालाई सुरुवाती अग्रता दिलाएका थिए । यद्यपी निर्धारित र थप गरिएको समयसम्म दुबै टिमले २–२ गोलको बराबरी खेलेपछि खेल पेनाल्टीमा धकेलिएको थियो । पेनाल्टीमा क्रोएसियासँग ४–३ ले पराजित हुदै आयोक रसिया विश्वकपबाट बाहिरिएको थियो ।

७. नासर चाड्ली, बेल्जियम

नासर चाड्लीले बेल्जियमलाई अन्तिम समयमा गोल गर्दै क्वाटरफाइनलमा पुर्याउन ठूलो भूमिका खेले । उनले गरेको गोल रसिया विश्वकपको टप सेभेनमा परेको छ ।  उनले खेलको अतिरिक्तसमयको केही सेकेन्डबाँकी हुदा गोल गरेका थिए । कर्नर किक हान्दा जापानका सबै खेलाडी बेल्जियमको डिबक्स एरियामा आएका थिए । जापानले प्रहार गरेको कर्नर किक बेल्जियमका गोलरक्षकले सजिलै समातेपछि उनले तत्काल बल रिलिज गरे ।
जापानको डिबक्सभित्र पाएको पासलाई सदुपयोग गर्दै नासरले गोल गर्न सफल भएका थिए ।

८. अहमद मुसा, नाइजेरिया

फिफाले सार्वजनिक गरेको उत्कृष्ट टप टेन गोलमध्ये आठौं नम्बरमा नाइजेरियाका फरवार्ड अहमद मुसाको गोल रहेको छ । उनले आइसल्यान्डविरुद्ध २ गोल गरेका थिए । मैदानको मध्य भागबाट दिएको पासलाई मुसाले उत्कृष्ट प्रदर्शन गर्दै गोल गर्न सफल भए । उनले डिफेन्डरलाई छलेर किपरलाई पनि विट गर्दै प्रहार गरेको बल आइसल्यान्डको जाली चुमेको थियो । यो खेलमा नाइजेरियाले आयसल्यान्डलाई २–० गोलले पराजित गरेको थियो ।

९. रिकार्डो क्वाइरेस्मा, पोर्चुगल  

पोर्चुगलका रिकार्डो क्वाइरेस्माले इरानविरुद्ध गरेको गोल रसिया विश्वकपको उत्कृष्ट नवौं नम्बरमा परेको छ । उनले खेलको ४५औं मिनेटमा गोल गर्दै पोर्चुगललाई अग्रता दिलाएका थिए । उनले डिबक्स बाहिरबाट राइट फुटेट सट प्रहार गर्दै गोल गरेका थिए । यद्यपी पोर्चुगलले इरानविरुद्ध १–१ गोलको बराबरी खेलका थिए ।

१०. टानी क्रुस, जर्मनी

टोनी क्रुसले स्वीडेनविरुद्ध गरेको गोल रसियामा सम्पन्न विश्वकप फुटबलको टप टेन नम्बरमा परेको छ । उनले अन्तिम समयमा फ्रिकिकबाट गोल गर्दै जर्मनीलाई जित दिलाएका थिए । जर्मनी र स्वीडेनबीचको खेल बराबरीमा सकिन लागेको थियो । अन्तिम समयमा जर्मनीले स्वीडेन पोष्टको देब्रेपटि फ्रिकिक पायो । फ्रिकिक प्रहार गर्नका लागि मिड्फिल्डर टोनी क्रुस आए ।  मार्को रेउससँगको तालमेलमा उनले उत्कृष्ट गोल गर्दै जर्मनीलाई जित दिलाएका थिए ।