एजेन्सी । इंग्ल्यान्डले सन् २०३० को विश्वकप फुटबल आयोजना गर्नको लागि आफ्नो दाबी पेश गर्ने भएको छ । इंग्ल्यान्डको फुटबल एसोसिएसन (एफए) ले सन् २०३० को विश्वकप फुटबल आयोजना गर्ने दाबी गरेको हो ।

१२ वर्षपछि हुने विश्वकप आयोजनाको लागि एफएले तयारी समेत सुरु गरिसकेको बीबीसीले उल्लेख गरेको छ । इंग्ल्यान्डले ठूलो प्रतियोगिताको रुपमा पछिल्लो पटक सन् १९९६ को युरोकप आयोजना गरेको थियो । इंग्ल्यान्डले विश्वकप भने सन् १९६६ मा पहिलो पटक आयोजना गरेको थियो । जुन विश्वकप फुटबलको उपाधि इंग्ल्यान्डले नै जित्न सफल भएको थियो ।

एफएका अध्यक्ष ग्रेग क्लार्कले विश्वकपको आयोजनाको लागि दाबी पेस गर्न सहमति भईसकेको बताएका छन् । “सन् २०३० को विश्वकप आयोजना गर्न युईएफएबाट सम्भावित उम्मेदवार बन्न गत महिना नै बोर्ड सहमत भईसकेको छ,” क्लार्कले भनेका छन् ।

सन् २०२२ को विश्वकप फुटबल कतारमा हुँदैछ । त्यस्तै, २०२६ को विश्वकप अमेरिका, मेक्सिको र क्यानडाले गर्ने भईसकेका छन् । सन् २०२६ देखि विश्वकपमा सहभागि राष्ट्र ४८ हुने यसअघि नै विश्व फुटबल महासंघ (फिफा) ले निर्णय गरिसकेको छ ।