काठमाडौं । पोखरा प्रिमियर लिग (पीपीएल) क्रिकेट प्रतियोगिताको तयारी तीव्र पारिएको छ । आगामी कात्तिकमा हुने पीपीएलको लागि अहिले मैदानको पिच निर्माणदेखि अस्थायी प्याराफिट निर्माण गर्ने कार्य भई रहेको छ ।

आयोजक क्वीन्स इभेन्ट प्रालीले प्रतियोगितालाई भब्यताको साथ सम्पन्न गर्न कार्यलाई अगाडि बढाएको हो । अहिले भारतबाट क्वुरेटर सन्तोष सिंह ल्याएर ४ वटा पिच निर्माण कार्य तयारी भई रहेको छ । 

नेपाली क्रिकेट टिमका कप्तान पारस खड्काले यो प्रतियोगिताले नेपाली क्रिकेटको विकासमा टेवा पुग्ने बताउँदै पोखरालाई स्पोर्टस् सिटीको रुपमा विकास गर्न सकिने बताए । 

करिब २ करोड भन्दा वढी खर्च हुने प्रतियोगिता सम्पन्न गर्न पोखरा क्रिकेट रंगशालामा करिब ४५ सय दर्शक क्षमताको अस्थायी प्यारापिट निर्माण गर्दै गरेको क्वीन्स इभेन्ट प्रालीका प्रवन्ध निर्देशक छुम्बी लामाले बताए ।

६ वटा ‘फ्रेन्चाइज बेस’ टिम रहने पीपीएलमा काठमाडौं, पोखरा, विराटनगर, बुटवल, धनगढी, नेपालगञ्ज र चितवनले प्रतियोगितामा भाग लिने छन् । एउटा टिममा २ जना विदेशी खेलाडी रहनु पर्ने आयोजकले बताएको छ । प्रतियोगिताको लागि नेदरल्यान्ड्स, हङकङ र युएईका खेलाडीले खेल्ने इच्छा देखाएको प्रबन्ध निर्देशक लामाले जानकारी दिए ।

प्रबन्ध निर्देशक लामाले भने “घरेलु प्रतियोगितामा अहिलेसम्म पुरस्कार राशि २५ लाखको रहेको छ । यो भन्दा बढि पुरस्कार राशी बनाउने लक्ष्यमा हामी छौ ।”

टिममा दुई स्थानीय र दुई विदेशी खेलाडी हुने जानकारी गराएको हो । आगामी कात्तिक ९ गतेदेखि २० गतेसम्म हुने प्रतियोगिताका लागि पोखरा रंगशालास्थित क्रिकेट मैदान मर्मतसम्भारको काम भइरहेको छ ।  त्यस्तै, प्रदेश नम्बर ४ का मुख्य मन्त्री पृथ्वी सुब्बा गुरूङले आफु क्रिकेट प्रेमी भएको भन्दै प्रदेश सरकारले आवश्यक सहयोग गर्ने आश्वसन दिएका छन् । 

नेपाली क्रिकेट टिमका मुख्य प्रशिक्षक जगत टमाटाले क्लोज क्याम्पको लागि टियु क्रिकेट मैदानको विकल्पको रुपमा पोखरा रंगशाला भएको बताए ।