एजेन्सी । आफ्नै छोरीको विवाहमा उपस्थित नभएर विवादमा रहेका मेगानका पिताले शााही परिवारसँग आबद्ध भएपछि छोरीसँग अब कहिल्यै भेट्न नपाउनेबारे ठूलो चिन्ता व्यक्त गरेका हुन् । गत मे महिनामा मात्र पूर्व अमेरिकी अभिनेत्री, मेगानको राजकुमार ह्यारीसँग विवाह भएको थियो । तर त्यो भन्दा अगाडिदेखि नै मेक्सिकोमा बस्दै आएका पिता थोमस मार्कल र उनीबीच राम्रो सम्बन्ध नरहेकोबारे विभिन्न खुलासा भएको थियो । 

त्यसैले राजकुमार ह्यारीसँगको विवाहपछि त आफू छोरीबाट झन टाढा हुन पुगेको भन्दै उनले मिडियासामु गुनासो गरिरहेको समाचार एजेन्सी रोयटर्सले जनाएको छ । अब मेगानले आफूलाई फेरि कहिल्यै सम्पर्क नगर्ने डर रहेको उनले अन्तर्वार्ताका क्रममा बताएका हुन् । उनले भनेका छन्, ‘अब मलाई उसँग फेरि भेट हुन्छ भन्ने कुनै आशा छैन । तर मैले के गर्न सक्छु र ?’ 

३७ वर्षीया मेगान भने विवाहपछि विभिन्न शाही कार्यक्रमहरुमा सहभागी भइरहेकी छन् तर आफ्ना पिताका विषयमा भने अहिलेसम्म उनले कुनै प्रतिक्रिया दिएकी छैनन् । वास्तवमा लामो समयअघि देखि नै उनको परिवारको विषय विवादित रहँदै आएको छ । यस्तोमा पितासँगको सम्बन्ध ठीक नभएकै कारण थोमस छोरीको विवाहमा समेत उपस्थित नभएको चर्चा चलेको थियो । तर थोमसले भने आफू त्यस समय हृदय शल्यक्रियाको लागि अस्पतालमा उपचाररत भएकाले स्वास्थ्य स्थितिका कारण सहभागी हुन नपाएको बताउने गरेका छन् ।

तरपनि विवाह नजिकिँदै जाँदा थोमसका विभिन्न तस्बिरहरु मिडियामा लगातार आइरहेका थिए जसमा उनी साइबरमा गएर ह्यारी र मेगानको विवाहबारे कम्प्युटरमा पढिरहेको र खोजिरहेको अवस्थामा फेला परेका थिए । यस्तोमा उनलाई विवाहमा नबोलाइएकाले नै त्यसै समय शल्यक्रिया गराएको हुन सक्ने चर्चा चलेको थियो । तर आइतबार प्रकाशित अन्तर्वार्तामा भने थोमसले राजकुमार ह्यारीमाथि विवाह अगाडि आफूलाई ती तस्बिरहरुबारे गाली गरेको आरोप लगाएका हुन् । ह्यारीले त्यसरी आफूसँग नराम्रो तरिकाले कुरा गर्दैगर्दा आफूले उनको फोन बीचमै काटिदिएको समेत उनले खुलासा गरेका छन् ।

तर विवाहपछि आफूले धेरैपटक मिडियासँग अन्र्तक्रिया गरिरहँदा पनि छोरी मेगानबाट भने कुनै खबर प्राप्त नभएको उनी बताउँछन् । 

त्यसैकारण आफू उनीबाट सधैँका लागि टाढा भइसकेको र अब बेलायती शाही परिवारले छोरीसँग कहिल्यै सम्पर्क गर्न नदिने चिन्ता रहेको उनले बताएका हुन् । 

उनले भनेका छन्, ‘मसँग उसलाई सम्पर्क गर्ने कुनै माध्यम छैन । मैले फोन गर्ने गरेको नम्बरले अहिले कुनै काम गर्दैन र मसँग चिठी लेख्न समेत उसको कुनै निश्चित ठेगाना छैन ।’  तरपनि अझै आफूले छोरीलाई धेरै सम्झिने गरेको र उसको जीवनमा आउन चाहेको उनले बताएका छन् । 

उनले भने, ‘म मेगानसँग विगतका सबै मनमुटावहरु बिर्सिएर फेरि सधैँझैँ बाबुछोरीको सम्बन्ध राख्न चाहान्छु । मैले ह्यारीलाई पनि एउटा सन्देश दिनुछ कि म उनको नयाँ ससुरा हुँ र यसलाई उनले स्वीकार्नैपर्छ ।’  यस अन्तर्वार्ताबारे ह्यारीको कार्यालय केइन्स्टन प्यालेसले भने कुनै प्रतिक्रिया दिएको छैन ।